Ұлы Абайдың туған күніне орай, Жидебайда жалпы білім беру ұйымдарының 8- 11 сынып оқушылары арасында ҚР Білім және ғылым министрлігі, республикалық «Дарын» ғылыми-практикалық орталығы және Шығыс Қазақстан облыстық Білім басқармасы мен Абай аудандық білім бөлімінің ұйымдастыруыменХХ Республикалық «Абай оқулары» байқауы өтті.
Абай оқуларының негізгі мақсат-міндеті – қазақ халқының әдеби мұрасын дәріптеу, мектеп оқушыларының классикалық әдебиетті оқуға деген қызығушылығын арттыру, Абай, Шәкәрім шығармаларын насихаттау, ұлттың рухани мұрасын қастерлеуге тәрбиелеу.
Республикамыздың түкпір-түкпірінен жи-налған жүзден астам оқушы жол-жөнекей «Еңлік-Кебек» ескерткіші, сырт Қасқа-бұлақтағы, Үйтастағы және Шілікті кезеңіндегі театрландырылған қойылымдарды тамашалап, жердің, елдің тарихымен танысты. Абай мен Шәкәрім жүрген топырақты басып, Шыңғыстаудың керімсал, жанға жайлы ауасымен тыныстаған оқушылар Қарауыл ауылына көтеріңкі көңіл-күймен келді. Осы ретте қонақтарға тағылымды шара – сахналық көріністер ұсынған М.Әуезов, С.Бекбосынов, Мамай атындағы мектептер мен Қарауыл мек-теп-гимназиясының (директорлары — Н.Орын- бекұлы, Б.Тілеубай, Р.Ұзақова, Қ.Жарасбаев) өнерлі оқушылары мен ұстаз-дарының еңбегін атай кеткен жөн.
Қарауыл ауылында сайысқа қатысушы оқушылар Абай ескерткішіне гүл шоқтарын қойып, рухына тағзым етті.
— Ардақты ағайын, құрметті қонақтар! Бүгін Абай елінде, киелі Шыңғыстау жерінде үлкен мереке. Абай — қазақ халқының ұлттық мақтанышы. Сіздер алыптарды дүниеге әкелген ұлы мекенге алғаш рет аяқ басып отырсыздар, шын жүректен құттықтаймын! Заңғар жазушымыз Мұхтар Әуезовтің «Абай лебі, Абай үні, Абай тынысы — заман тынысы» деген ұлағатты сөзі бар. Абай — алып бәйтерек. Сол бәйтеректің саясында өлең оқып, Абай туралы толғануға, тебіренуге келген сіздер шын бақытты ұрпақсыздар. Тұңғыш Президентіміз Н.Назарбаев: «Қазақ халқының киесі, ары мен намысы, ақылы мен жүрегі ұлы Абайдың аруағына басымды идім»,- деп ерекше тебіренген болатын-ды. Бұл — данышпан Абайға берілген әділ баға.
Қазіргі таңда Абайдың 175 жылдық торқалы тойына әзірлік жұмыстары жан-жақты жүргізілуде. Абай тойын өткізу жөнінде Президентіміздің Жарлығы шығып, арнайы комиссия құрылып отыр. Міне, енді сіздер келіп, Абай рухын көтеріп отырсыздар. Абай тойы 20 жылдық тарихы мен жолы бар «Абай оқулары» байқауынан бастау алып отыр. Осы орайда бұдан 20 жыл бұрын «Абай оқуларын» алғаш рет ұйымдастырып, республикалық дәрежеге көтерген министрлік қызметкерлері — Абай ауданының Құрметті азаматы Роза Батталова мен Тілдаш Битуованың аттарына ерекше алғыс айтқым келеді.
Құрметті оқушылар! Сіздерге тұлпардың шабысын тілеймін! Абай, Шәкәрім, Мұхтар рухтары қолдап, жебей берсін,- деді Абай ауданының әкімі Жарқынбек Байсабыров.
Мұнан кейін ҚР білім беру ісінің үздігі, ана тілінің жанашыры Тілдаш Битуова, республикалық «Дарын» ғылыми-практикалық орталығы директорының орынбасары Ғажданбек Тұрсынов, ШҚО Білім басқармасының басшысы Сайрангүл Жұмағұлова сөз алып, поэзия сайысын өткізуге көмек көрсетіп отырған Абай ауданының әкімі Жарқынбек Байсабыров пен білім саласының қызметкерлеріне рақмет айтты. Жас сайыскерлерге шабыт пен жеңіс тіледі.
«Абай оқулары» осыған дейін 3 аталым бойынша өткізілген болса, биыл «Өлең – сөздің патшасы, сөз сарасы», «Абайдың қара сөздері», «Абайдың ақын шәкірттерінің шығармалары», «Көңілім әнді ұғады», «Жүйріктен жүйрік озар жарысқанда» және «Ұлылар әлемі» атты 6 аталымды қамтыды.
Республикалық байқауға Ақмола, Ақтөбе, Атырау, Батыс Қазақстан, Жамбыл, Қарағанды, Қызылорда, Маңғыстау, Павлодар, Солтүстік Қазақстан, Шығыс Қазақстан, Түркістан, Алматы, Қостанай облыстары мен Нұр-Сұлтан, Алматы, Шымкент қалалары және Абай ауданының командалары қатысып, 2 күн бойы Абайдың қара сөздері мен Шәкәрімнің шығармаларынан үзінділер оқыды. Шыңғыстау аспанында Абай әндері қалықтады. Жеңіске жеткен өнерлі оқушылар ҚР Білім және ғылым министрінің, республикалық «Дарын» орталығының, ШҚО Білім басқармасының және Абай ауданы әкімінің бағалы сыйлықтарымен жіне алғыс хаттарымен марапатталды. Бір топ өнерлі ұстаздарға аудан әкімінің алғыс хаттары тапсырылды.
Сайыс қорытындысы бойынша, Сабина Сембекқызы (Жамбыл облысы), Диляра Қадырмолдина, Бағжан Кәріпбаева, Аңсар Амангелдин, Заңғар Нұртасұлы (ШҚО), Әйгерім Мұқаш, Маржан Жидебай (Ақтөбе облысы), Абзал Мақашев (Қарағанды облысы), Рамазан Балтабеков (Қызылорда облысы), Жаңыл Сабыржан (Қостанай облысы), Рахметолла Даниал (Павлодар облысы) ерекше көзге түсіп, І дәрежелі дипломға ие болды. ІІ дәрежелі дипломға 18, ІІІ дәрежелі дипломға 30 оқушы қол жеткізді. Жеңімпаздарға Шәкәрім атындағы университеттің, Л.Гумилев атындағы Еуразия ұлттық университеті және А.Жұманов атындағы Ақтөбе өңірлік университеті ректорларының гранттары табыс етілді.
Жидебайда өнер көрсеткендеріне риза-шылықтарын білдіріп, қонақжай Абай еліне алғыстарын айтқан жас сайыскерлер Абай елімен қимай қоштасты.
Совет МАХМЕТОВ, «Семей таңы»{jcomments off}
