29 тамыз, бейсенбі күні Семей қаласы әкімдігінің қабырғасында қалалық мәслихаттың кезектен тыс, 41 сессиясы өтті. Күн тәртібінде қаралған басты мәселе мәслихаттың 2018 жылғы 21 желтоқсандағы «Семей қаласының 2019-2021 жылдарға арналған бюджеті туралы шешіміне» өзгерістер мен толықтырулар енгізу болды.
Экономика және қаржы бөлімі басшысының орынбасары Елена Кузнецова бюджетке енгізілетін түзетулер туралы айтып өтті. Баяндамашының айтуынша, 2019 жылы меншікті табыс көздерінің ұлғаюына байланысты бюджетке 350 млн. теңге түседі деп жоспарлануда. Осыған байланысты әлеуметтік қамсыздандыру, білім беру, төтенше жағдайлар және қоғамдық тәртіпті сақтау салаларындағы қаржыландыру артады. Сонымен бірге жалпы сипаттағы мемлекеттік қызметтерді қаржыландыру көлемі 60 миллион теңгеге дейін, сонымен қатар мәдениет, спорт, туризмді дамыту салаларына жоспарланған қаражат көлемі де қысқарады.
Күн тәртібіндегі екінші мәселе бойынша депутаттар Караулен және Социалистік Қазақстан ауылдарын тарату және есепті деректерден шығару жөнінде шешім қабылдады. Сонымен қатар сәулет және қала құрылысы кеңесінің және сайлау комиссияларының жекелеген мүшелерін қызметтен босату мәселелері де талқыланды.
Жадыра ТӨЛЕГЕНҚЫЗЫ, «Семей таңы»{jcomments off}
