Біріккен Ұлттар Ұйымының шешіміне сәйкес, 1 қазан Қарттар күні болып жарияланған және бұл күн жыл сайын әлемдік деңгейде аталып өтеді.
Осыған орай, қалалық Соғыс, еңбек ардагерлері және Қазақстан Республикасы Қарулы Күштерінің ардагерлер кеңесі ұйымдар мен мекемелер, кәсіпорындар басшыларына, фирмалар жетекшілеріне, кәсіпкерлерге және жергілікті банктер филиалдары басшыларына өтініш білдіреді.
Бастауыш ардагерлер және кәсіподақ ұйымдарымен бірлесіп еңбек мерекесі, қайырымдылықпен амандық мерекесі ретінде Қарттар күніне дайындық және оны лайықты өткізу жөніндегі іс-шаралар жоспарын әзірлеу қажет. Қарияларға, соғыс, тыл және еңбек ардагерлеріне үлкен көңіл бөліп, оларға қошемет пен құрмет көрсетулеріңізді сұраймыз.
Қарттарға ілтипат білдіріп, аталған күнге орай жиындар өткізіп, олардың өткен және қазіргі өмірлік, соғыс және еңбек жолдарын көрсету қажет. Сондай-ақ моральдық және материалдық тұрғыдан қолдау мүмкіндіктерін іздестіру керек. Әсіресе жалғыз басты, науқас қарттарға ерекше көңіл бөліп, тұрғын үйлерін жөндеуге, қысқы отын мен дәрі-дәрмек сатып алуға нақты көмек берулеріңізді өтінеміз.
Ардагерлер кеңесі үкіметтік емес қоғамдық ұйым болып саналады, сондықтан да қаржыландыру көздері қарастырылмаған. Осыған орай, қалалық ардагерлер кеңесінің президиумы барлық ұйымдар, мекемелер, кәсіпорындар мен банк басшыларын, фермерлерді, кәсіпкерлер мен өзге де іскер азаматтарды қала бойынша Қарттар күнін жоғары деңгейде өткізіп, қайырымдылық ретінде жәрдем көрсетуге шақырады.
Біз барлық салалар мен бөлімшелер, коммерциялық және өндірістік құрылымдар басшыларының осы маңызды іс-шараны ұйымдастыруға белсенді түрде қатысатындарына сенімдіміз.
Ардагерлер –қоғамның алтын қоры, оларды құрметтеу, қамқорлық жасау — біздің міндетіміз.
Амантай ДОҒАЛАҚОВ, қалалық ардагерлер кеңесінің төрағасы.{jcomments off}
