Елбасы Н.Ә.Назарбаев «Қазақстанның Үшінші жаңғыруы: жаһандық бәсекеге қабілеттілік» атты Жолдауында, «Болашаққа бағдар: рухани жаңғыру» мақаласында ұлт санасын жаңғыртуға, қазақстандық мәдениетті ілгерілетуде және дәстүрлеріміз бен мәдениетіміздің нарықтық қағидаларын қалыптастыруға қатысты мәдениет-өнер саласының қызметкерлеріне үлкен жауапкершілік жүктеген болатын. Мәдениет саласын дамытуға бағытталған кешенді шаралар Президентіміз Қасым-Жомарт Кемелұлы Тоқаевтың Қазақстан халқына арнаған алғашқы Жолдауында қолдау тапты. Қасым-Жомарт Кемелұлы экономиканың негізгі бағыттарын дамытуға басымдық бере отырып, мәдениет саласына да баса назар аударды.
«Мәдениет қызметкерлерін қолдау қажет. Біз мәдениет саласында еңбек ететін адамдарға жеткілікті түрде көңіл бөлмей отырмыз. Бұл ең алдымен кітапхана, музей, театр қызметкерлеріне қатысты мәселе. Олардың еңбекқақысы соңғы жылдары мүлде көбейген жоқ. Соның салдарынан мәдениет қызметкерлері, әсіресе жас мамандар жеңілдікпен берілетін тұрғын үй бағдарламаларына қатыса алмайды. Мұндай ахуал осы кәсіптің беделін түсіріп, лайықты кадрлардың тапшылығы айқын сезілуде», — деді Мемлекет басшысы Қазақстан халқына Жолдауында.
Осы мәселені есепке ала отырып, Президент келесі жылдан бастап мәдениет қызметкерлерінің жалақысын көбейту қажеттігін атап өтті.
«Сондай-ақ білім беру және денсаулық сақтау салаларындағы міндетті әлеуметтік жеңілдіктер мәдениет саласының өкілдеріне де берілуі керек», — деді ел Президенті.
Жанат АНДАСОВА,
Үржар аудандық мәдениет
және тілдерді дамыту
бөлімінің басшысы
