25 қыркүйек, сәрсенбі күні қалалық әкімдікте қалалық мәслихаттың кезекті, қырық екінші сессиясы өтті. Бұл жолғы күн тәртібінде төрт мәселе қаралды.
Қалалық тұрғын үй — коммуналдық шаруашылығы бөлімінің басшысы Амантай Өтелбаев алдағы қысқа дайындық жұмыстары жайлы баяндады. Оның айтуынша, мектепке дейінгі мекемелер, мектептер, ауруханалар мен әлеуметтік мекемелер қатты отынмен толық қамтылған. Көп қабатты тұрғын үйлерді жылумен қамтуда да туындаған мәселе жоқ. Жалпы, қаланың қысқа дайындығы 95%-ды құрайды. Кейбір жылу желілерін жөндеу жұмыстары тамамдалуда.
Өңірде халықтан сүт сатып алу көлемі ұлғаяды. Бұл туралы қалалық ауыл шаруашылығы бөлімінің басшысы Нұрлан Шақабаев өз баяндамасында айтып өтті. Оның мәліметінше, Семей өңірінде өндірілетін сүт өнімдері жергілікті халықты толық қамти алмай отыр. Қазір бұл көрсеткіш 35 пайызды құраса, алдағы уақытта 80-90 пайызға дейін жеткізу көзделуде.
— Көкентау, Прииртышский, Озерки, Жиенәлі, Достық ауылдық округтерінде халықтан сүт сатып алу мәселесі жолға қойылып келеді. Сонымен қатар Ертіс, Новобаженова, Знаменка ауылдарында да сүт қабылдау пукттері бар. Өнімдер «Қалиханұлы», «Нұр», «ПВП» шаруа қожалықтарына жіберіледі. Облыс әкімі Даниал Ахметовтің, қала әкімі Ермак Сәлімовтің тапсырмасымен, халықтан сүт қабылдау көлемін ұлғайтудамыз. Құрал-жабдықтар сатылып алынуда,- дейді Н.Шақабаев.
Бөлім басшысы мәлімдегендей, 2021 жылы 1200 басқа арналған жаңа сүт-тауарлы ферма құрылысы басталады. Жоспар бойынша құрылыс жұмыстары 2023 жылы аяқталмақ. Сүт фермасында болашақта мал басын 2400 басқа дейін ұлғайту көзделуде.
Өзін-өзі жұмыспен қамтушы халыққа салық салу және қаладағы халыққа қызмет көрсету орталықтарының қызметі туралы да сессия барысында сөз болды. Мәслихат депутаттары баяндамашыларға сауалдарын қойып, көтерілген мәселелерді жан-жақты талқылады.
Жадыра ТӨЛЕГЕНҚЫЗЫ, «Семей таңы»{jcomments off}
