Шүлбі кентінде, Жастар жылына орай, «Ұлан» әскери-патриоттық және азаматтық тәрбие беру орталығының базасында Шығыс Қазақстан облысы әкімінің жүлдесіне арналған «Aibyn» VI Облыстық әскери-патриоттық жастар жиыны өтті.
Жиынға Шығыс Қазақстанның қалалары мен аудандарынан он әскери-патриоттық топ қатысты. Барлығы да әскери-патриоттық сайыстың қалалық және аудандық кезеңдерінің жеңімпаздары.
Екі күн бойы командалар саптық дайындық, физикалық нормативтерді тапсыру, автомат құрастыру мен бөлшектеу, әскерилендірілген кросс сынды жарыстарға қатысып, «Айбын дауысы» вокалдық фестивалінде өнерлерін көрсетті. Жиын аясында «IQazaqstan» зияткерлік ойыны мен робототехникадан «Менің роботым» атты сайыс өткізілді.
— Әскери-патриоттық жиын Жастар жылы аясында өткізілуде. Басты мақсат – жастар арасында салауатты өмір салтын насихаттау, жастарды әскери-спорттық және техникалық дайындыққа үйрету, — дейді ШҚО ішкі саясат басқармасы басшысының орынбасары Ришат Рамазанов. – Осындай іс-шараларды өткізе отырып, біз болашақ Отан қорғаушыларымызды тәрбиелейміз. Әр команда жеңіске лайық, өйткені жиынға Шығыс Қазақстан облысының мықты топтары қатысуда.
Жарыс қорытындысы бойынша, бас жүлдені Семей қаласының «Жас қыран» әскери-патриоттық клубы, бірінші орынды Жарма ауданының «Жас сақшы» командасы, екінші орынды Зайсан ауданының «Айбын» командасы жеңіп алса, үшінші орынды Өскемен қаласының «Жас бүркіт» командасы иеленді.
Енді жеңімпаздар республикалық «Айбын» әскери-патриоттық ойындарына дайындықты бастайды.
Естеріңізге сала кетейік, биылғы жылы Қарағанды облысында өткен «Айбын» республикалық жиынында Семейден барған топ жеңімпаз атанған болатын.
Семей қаласының ақпараттық орталығы{jcomments off}
