Қала әкімі Ермак Сәлімов мемлекеттік «Нұрлы жер» бағдарламасы арқылы жеке секторда баспана салғысы келетін тұрғындармен кездесу өткізді.
Жиын барысында Ермак Бидахметұлы тұрғын үй салуға ниетті азаматтарға мемлекет есебінен тегін берілетін жер телімін алу тәртібін жан-жақты түсіндіріп, осы салада атқарылып жатқан жұмыстардан хабардар етті.
— Ақсай, Ұшақтар, Комсомол кенттерінде қазіргі уақытта су құбырлары және электр желілері тартылуда, осы жылдың соңында аяқталады,- деп атап өтті қала басшысы.
Осы кенттердегі жер учаскелеріне тұрғын үй құрылысын салу белгіленген талаптар бойынша «Тұрғын үй құрылыс жинақ банкі» АҚ және баспана салумен айналысатын құрылыс мекемелері арқылы жүзеге асады.
Кездесуде қала тұрғындары банк қызметкерлеріне және құрылыс мекемелерінің өкілдеріне өз сауалдарын қойып, толыққанды жауаптар алды. Салынатын үйлердің жобаларымен танысты.
Баспана салудың өзіндік тәртібі бойынша тұрғын үйдің құрылысы жер телімінің иесі, жер қатынастары бөлімі, банк және құрылыс мекемесі арасындағы төрт жақты келісімшарт бойынша іске асады.
Қазіргі уақытта қала әкімдігіндегі жер қатынастары бөлімінде жер телімін алу үшін 24 мың қалалық кезекте тұр.
Роллан КЕМЕРБАЕВ, қала әкімінің баспасөз хатшысы{jcomments off}
