Бейсенбі, 7 қараша күні жер қатынастары бөлімінің басшысы Құдайберген Сейілханов ақпараттық орталықта баспасөз конференциясын өткізді. Конференцияда бос жер телімдерін игеру, жер кезегі және өзге де сұрақтар талқыланды.
Семей қаласында бүгінде жеке тұрғын үй құрылысы үшін жер алу кезегінде 24 472 адам тұр. ҚР Жер кодексіне сәйкес, жеке тұрғын үй құрылысы үшін жер алғысы келетін азаматтар арнайы есепке алынады.
— Семей қаласы әкімдігі мен жер қатынастары бөлімі 2007 жылдан кезекте тұрған азаматтарға хабарласып, анықтау жұмыстарын жүргізді. Нәтижесінде 1466 адамның ғана байланыс деректері расталды. «Тұрғын үй құрылыс жинақ банкі» АҚ-мен бірлесе жүргізген талдау барысында жер кезегіндегі 2638 адамның банкте жинағы бар екені анықталды. Оның ішінде 77 адамның төлем қабілеттілігі тексеріліп, банк тек бір адамды ғана төлем төлеуге қабілетті деп таныды, — деді жер қатынастары бөлімінің басшысы Қ.Сейілханов.
Бөлім басшысының айтуынша, қазір Семейде кезекте тұрған азаматтарға жер телімін беретіндей аудан жоқ. Себебі жер телімі бос аудандарда коммуникация желілерін тарту жұмыстары әлі аяқталмаған. Қаланы дамытудың Бас жоспарына сәйкес, жер кезегіндегі тұрғындардың мәселесін шешу үшін он тұрғын алабы анықталған. Олар Ақсай, Ұшақтар, Комсомол кенті, Суық бұлақ, Жарқын, Бобровка, Ақ қайың, Жібек жолы, Кіші Ақтөбе, Степной кенті. Аталған тұрғын үй алаптарында 13715 жер телімдері қарастырылған.
Ақсай, Ұшақтар, Комсомол кенттерінде коммуникациялық желілерді тарту жұмыстары аяқталуға жақын. Сонымен қатар аталған аудандарда «Нұрлы жер» бағдарламасы аясында жеке тұрғын үй құрылысы да қарқынды жүруде.
— Коммуникациялық желілерді тарту жұмыстары аяқталған соң, кезекте тұрған тұрғындар тиісті жер телімін ала алады, — дейді бөлім басшысы.
Қазіргі таңда жалпы алаңы 9 378,1 гектарды құрайтын ауыл шаруашылығы мақсатындағы пайдаланылмаған, немесе жер заңнамасы сақталмаған 23 жер телімі анықталған. Аталған 23 жер теліміне зерттеу жұмыстары жүргізіліп, актілер жасалып, ШҚО Жердің пайдаланылуы мен қорғалуын бақылау басқармасына тексеруге жіберілген.
Бөлім басшысы айтып өткендей, құрылыс салу мақсатында алынған жердің игерілу мерзімі үш жыл. Бірақ жеке тұрғын үй құрылысы үшін сатылып алынған жер кері қайтарылуға жатпайды. Ал ауыл шаруашылығы мақсатындағы жерді пайдаланбау фактісі анықталған жағдайда игеруге екі жыл уақыт беріледі.
— Бүгінгі күні мақсатты пайдаланылмаған жер телімдері 17 жекеменшік иелеріне берілді. Олардың қатарында қаладағы Шәкәрім даңғылы, 3 мекенжайындағы 4,5 га аумақты қамтитын бұрынғы әскери штаб аумағы, сондай-ақ айналмалы жолдағы Қарқаралы 22/1 мекенжайындағы 1,85 га жер бар. Бұл жер телімі спорт-сауықтыру кешенінің құрылысы үшін жалға берілген болатын. Пайдаланылмаған жер телімдері бас прокуратура мен ҚР Ауыл шаруашылығы министрлігінің бақылауында. Мәселені шешу үшін тиісті шаралар қолданылып жатыр, — деді Құдайберген Сейілханов.
Бөлім басшысының сөзіне сүйенсек, бұрынғы әскери штаб аумағында үлкен супермаркет салынуы мүмкін. Қазір 4,5 га жер банк кепілдігінде тұр. Сомасы 2 миллион долларды құрайды.
— Қазір бұл мәселе шешілуде. Әскери штабтың орнына үлкен супермаркет салынады. Ал штабтың артындағы түрме ғимараты көп қабатты тұрғын үй болады. Ал Орталық саябақтың сәнін кетіріп тұрған үш қабатты ғимарат 2006 жылы сатылған. Бірақ иесі нысанды қымбатқа бағалауда. Қала бюджеті үшін бұл өте үлкен қаражат. Бірақ болашақта мемлекеттік сәулет бөлімі бақылауы арқылы қалпына келтірілуі мүмкін,- деді Құдайберген Сейілханов.
Жадыра ТӨЛЕГЕНҚЫЗЫ, «Семей таңы»
{jcomments off}
