7 қараша, бейсенбі күні «Nur Otan» партиясының Семей қалалық филиалында балалардың құқығын қорғау жөніндегі кеңестің отырысы өтті. Отырысқа партия филиалы төрағасының орынбасары Айнұр Арғынбекова, қалалық тұрғын үй-коммуналдық шаруашылық және тұрғын үй инспекциясы бөлімі басшысының орынбасары Диана Шаяхметова, Тұрғын үй құрылыс жинақ банкінің Семей қалалық филиалының кеңесшісі Жазира Ерғожина, «Қазақстанның Халық банкі» АҚ өкілі Юлия Смирнова және көпбалалы аналар қатысты.
«Nur Otan» партиясының Семей қалалық филиалы жанындағы балалардың құқығын қорғау жөніндегі кеңестің төрайымы Шолпан Шегедекова дөңгелек үстел барысында көпбалалы аналарға кеңестің жұмысын таныстырды. Аталған кеңес «Бақытты отбасы» жобасы аясында құрылған болатын.
— Балалардың құқығын қорғау жөніндегі кеңестің қаламызда жұмысын бастағанына бір жылға жуық уақыт болды. Көпбалалы аналарға, балаларға қатысты түрлі проблемаларды көтеріп, шешу жолдарын бірге қарастырып келеміз. Ай сайын осындай дөңгелек үстелдер ұйымдастырылады. Кеңес мүшелері құрамына қалалық мәслихат хатшысы Бейсенбек Ақжалов, «Nur Otan» партиясының Семей қалалық филиалы төрағасының орынбасары Айнұр Арғынбекова, ішкі саясат бөлімінің басшысы Нұржан Есенжолов, қалалық Қоғамдық кеңес төрайымы Зүлфия Жамалтдинова, «РТРК «Қазақстан» АҚ филиалы директоры Хасен Молдабаев, білім бөлімінің басшысы Наталья Фесенко, кәсіпкерлер палатасының Семей қалалық филиалы директоры Мақсат Сүйіншинов енді, — деді кеңес төрайымы Шолпан Шегедекова.
Қазір елімізде көпбалалы аналарға мемлекет тарапынан көрсетіліп жатқан қолдау ерекше. Облысымызда көпбалалы отбасыларға мектеп формасы бөлініп, балалар ыстық аспен қамтылуда. Қала әкімі Ермак Сәлімовтің тапсырмасымен осы жылдың 18 қазанында көпбалалы отбасыларды қамтамасыз ету жөнінде қалалық комиссия құрылды. Ермак Бидахметұлы төрағалық ететін комиссия құрамына Бейсенбек Ақжалов, жұмыспен қамту, әлеуметтік бағдарламалар және азаматтық хал актілерін тіркеу бөлімі басшысы Мұрат Құржықаев, Айнұр Арғынбекова, жеті балалы ана Сағыныш Төкенова, Шолпан Шегедекова және ТҮКШ бөлімі басшысының орынбасары Диана Шаяхметова енген.
— Аптасына бір рет бас қосып, көпбалалы аналардың мәселелерін тыңдап, шешу жолдарын ұсынамыз. Өздеріңізге белгілі, елімізде мамыр айынан бастап көпбалалы отбасылар арнайы тұрғын үй кезегіне алынуда. Осы уақытқа дейін Семей қаласында тіркелген 429 көпбалалы ананың 69-ы Қарағайлы ықшам ауданында сатып алу құқығынсыз берілетін жалдамалы пәтерлерге ие болды. Кезектің басында тұрған тағы 23 көпбалалы ана жыл соңына дейін Қарағайлы ауданындағы жаңа тұрғын үйлерден баспанамен қамтылады. «Бақытты отбасы» бағдарламасы шеңберінде бұл бағыттағы жұмысымызды жалғастыра береміз. 2019 жылы қаладағы 342 отбасы «Бақытты отбасы» бағдарламасына қатысуға жолдама алды. Оның 53-і — көпбалалы отбасы. Бағдарлама 2020 жылдың наурыз айында іске қосылады. Қалалық әкімдік пен «Тұрғын үй құрылыс жинақ банкі» АҚ арасында әріптестік туралы келісімшартқа қол қойылды. Бағдарлама аясында жаңа пәтер-лерді ғана емес, қолданыста болған тұрғын үйлерді де алуға болады. Сонымен қатар жеке тұрғын үй құрылысы үшін де несие алуға мүмкіндік бар, — деді Диана Шаяхметова.
Айта кетейік, көпбалалы отбасыларға, кәмелет жасына толмаған балалары бар толық емес отбасыларға, мүмкіндігі шектеулі бала тәрбиелеп отырған отбасыларға, жетім балаларға арналған «Бақытты отбасы» бағдарламасы аясындағы тұрғын үй несиесінің пайыздық мөлшерлемесі 2 %-ды, бастапқы жарна тұрғын үй құнының 10 пайызын құрайды. ҚР Үкіметінің қаулысына сәйкес, енді аталған топтар үшін бастапқы жарна мемлекет есебінен субсидияланады.
Дөңгелек үстел барысында көпбалалы аналар мамандарға тұрғын үй кезегі, балаларды емдеу-сауықтыру, инклюзивті сыныптар туралы сауалдарын қойды. Қаламызда дамуында кемістігі бар немесе гиперактивті балалар үшін инклюзивті сыныптар ашылған. Дегенмен аналар мүмкіндігі шектеулі балаларының күтімімен жұмысқа шыға алмайтындарын, ал инклюзивті сыныптардың тек екі-үш сағатқа арналғанын айтады. Ішкі саясат бөлімінің басшысы Нұржан Есенжолов балаларды сауықтыру орталықтарына мемлекеттік грант бөлуді қарастыратынын жеткізді.
— Әлеуметтік осал топтарға мемлекет көп көңіл бөлуде. Жұмыссыз азаматтардың, көпбалалы ана-лардың қосымша кәсіп игеріп, жұмысқа орналасуына жағдай жасалуда. Тұрғын үй мәселесінде де айтарлықтар жеңілдіктер көрсе-тілуде. Өкініштісі, халықтың көпшілігі осындай қолдаулардан бейхабар. Сондықтан «Nur Otan» партиясының филиалына, жұ-мыспен қамту орталықтарына барып немесе ғаламтордан оқып, іздену керек, -дейді А.Арғынбекова.
Жадыра ТӨЛЕГЕНҚЫЗЫ, «Семей таңы»{jcomments off}
