«Nur Otan» партиясының Семей қалалық филиалында партияның «Кедергісіз келешек» бағдарламасы аясында мүмкіндігі шектеулі жандарға арналған Ашық есік күні ұйымдастырылды. Іс-шараға «Nur Otan» партиясының Семей қалалық филиалы төрағасының орынбасары Айнұр Арғынбекова, қалалық жұмыспен қамту, сондай-ақ денсаулық сақтау бөлімінің мамандары қатысты.
Ашық күніне келген мүмкіндігі шектеулі жандар жергілікті атқарушы органдардың өкілдеріне сауалдарын қойды. Айталық, «Қазақ Соқырлар Қоғамы» қоғамдық бірлестігінің өкілдері қалада дыбысты бағдаршам орнатуды өтінді. Олардың сөзінше, Соқырлар қоғамы мекемесінің жанына 2006 жылы дыбысты бағдаршам орнатылған. Бұдан басқа қалада дыбысты бағдаршам жоқ.
– Жол-көлік қозғалысы қиын Абай мен Шәкәрім, Қабанбай батыр — Шәкәрім көшелері қиылыстарына екі бағдаршам орнатылса деген өтінішіміз бар. Өзге қалаларда мұндай бағдаршамдар көп. Біздің бұл мәселені көтеріп келе жатқанымызға көп уақыт болды. Еңбек және халықты әлеуметтік қорғау министрлігі Семей қаласына дыбысты бағдаршам орнатуға қаржы бөлінгенін айтты, — деді Никита есімді азамат.
Саңыраулар қоғамы жұмысқа орналасуда қиындықтардың көп екенін жеткізді. Олардың айтуынша, естуінде кемістігі бар жандарды ешкім жұмысқа қабылдағысы келмейді. 30 мың теңгеден асатын жәрдемақы да күнкөріске тақыл-тұқыл жетеді. Компьютерлік сауаттылықты үйрететін курстар ашылып, жұмыспен қамту орталығы мүмкіндігі шектеулі жандарға қатысты мәселелерді бақылауға алса деген тілектерін білдірді. Ал жиналғандар мұндай жағдайда Еңбек инспекциясы мүмкіндігі шектеулі жандарды жұмысқа қабылдаудан бас тартқандарға айыппұл салу керектігін айтады.
— Мүмкіндігі шектеулі жандар тарапынан айтылған барлық ұсыныстар мен сұрақтар партияның бақылауында. Бағдаршамдар жайлы жолаушылар көлігі және автомобиль жолдары бөлімінің, жұмысқа орналасу жөнінде жұмыспен қамту бөлімінің басшысына сауалдар жолдап, сіздерге хабарлап айтатын боламын, — деді Айнұр Арғынбекова.
Сонымен қатар жиын барысында мүмкіндігі шектеулі жандарды мүгедектік тобына шығару туралы кеңестер берілді.
Жадыра ТӨЛЕГЕНҚЫЗЫ, «Семей таңы»{jcomments off}
