14 қараша, бейсенбі күні, Бүкіләлемдік сапа күніне орай, «Ұлттық сараптау және сертификаттау орталығы» АҚ Семей қаласындағы филиалында қаладағы үздік кәсіпорындар марапатталды.
Бүкіләлемдік сапа күніне орай, «Ұлттық сараптау және сертификаттау орталығы» АҚ-ның Семей қаласындағы филиалы өнімдер мен қызмет көрсету сапасы бойынша үздік деп танылған кәсіпорындарды марапаттады.
Орталықтың шешімімен, биыл Семей қаласында «Сапа көшбасшысы — 2019» аталымына үш кәсіпорын лайықты деп танылған. Олар «Фирма Азия» ЖШС, «Семей» қонақ үйі және «Алина Групп» ЖШС-нің Аягөз қаласындағы филиалы.
— Бұл байқау бүкіл әлемде жыл сайын әртүрлі мамандықтар мен аталымдар бойынша өткізіліп келеді. Мақсаты – адамдарды сапаға мән беруге шақырып, кәсіпорындар арасында бәсекелестікті арттыру. Өздеріңізге белгілі, ел экономикасының дамуы халықаралық сапа стандарттарын енгізумен тікелей байланысты. Кәсіпорындардың жұмысын бағалау үшін арнайы бағдарламалар жасалып, сауалнама жүргізілді, — деді Ұлттық сараптау және сертификаттау орталығының Семей қаласындағы филиалының бөлім басшысы Гүлсара Нысанбаева.
Құрылыс материалдарын өндірумен айналысатын «Алина Групп» ЖШС-нің Аягөз қаласындағы филиалы Ұлттық сараптау және сертификаттау орталығымен он бес жылдан бері жұмыс істеп келеді. Компанияның барлық өнімдері аталған орталықтан сертификатталады.
— Біздің компания Қазақстанда 1989 жылы ашылған. Бас кеңсесі Алматы қаласында және елімізде бұдан басқа он бес филиалы бар. Ресей, Қырғызстан, Қытай мемлекеттерінде де бөлімшелері ашылған. ШҚО-дағы үлкен өндіріс ошағы саналатын Аягөз қаласындағы мекемеде 110 адам жұмыс істейді. Семей қаласында да екі филиалымыз бар, — дейді «Алина Групп» ЖШС лаборатория басшысы Дастан Әлбергенов.
Компания өкілдеріне сапа жұлдызы белгісі және дипломдар табысталып, орталықтың қызметкерлері алғыс хаттармен марапатталды.
Айтолқын САМАТОВА, «Семей таңы»{jcomments off}