Өткен аптада ел астанасы — Нұр-Сұлтан қаласында, Бейбітшілік және келісім сарайында V Республикалық «Worldskills Kazakhstan — 2019» чемпионаты болып өткен еді. Чемпионатқа еліміз бойынша өз ісінің үздіктері жиналған болатын.
Айта кетерлігі, аталмыш байрақты байқауда Шығыс Қазақстан облысының командасы жеңімпаз атанды. Барлығы 38 жүлденің 15-ін облыс жастары еншілепті. Оның ішінде 9 алтын медаль болса, 4 күміс және екі қола жүлде бар. Ал осы байқауда Семей Электротехникалық колледжінің студенттері білім деңгейі жоғары екенін дәлелдеп, жүлденің басым бөлігін қоржынға салыпты.
Үздік атанғандар қатарында аталмыш колледждің өнертапқыш студенттері Нұрасыл Әділов «Мехатроника», Арман Ұзақов «Электромонтаждау жұмыстары», Темірлан Серікжанұлы «Өнеркәсіптік автоматика» атты ұсынымдар бойынша қатарларының алды атаныпты.
Сонымен қатар Семей Құрылыс колледжі мен Радиотехника және байланыс колледжі студенттері де үздіктер қатарынан табылған.
Жеңімпаздар алдағы уақытта Австрия мемлекетінде өтетін Еуропа чемпионаты мен Біріккен Араб Әмірліктерінде өтетін Азия біріншілігіне қатысуға жолдама алды.
Мұның барлығы аталмыш оқу орындарындағы кәсіптік-техникалық білім беру мен оқыту жүйесінің жаңғыртылуы негізінде жүзеге асырылуда.
Өткен жексенбі күні жеңімпаздар Семейге оралды. Шаһар жұртшылығы, колледждер басшылары жастарды ыстық ықыласпен күтіп алды.
— Біз сіздермен мақтанамыз. ШҚО жастарының білімді екенін тағы бір мәрте дәлелдеп келдіңіздер. Ары қарай да биік жетістіктерге жетесіздер деген сенімдеміз,- деді өз құттықтау сөзінде Жастар орталығының жетекшісі Олжас Соғымбай.
{jcomments off}
«СТ» — ақпарат
