Өткен күндерге шегініс жасасақ, 1991 жылғы 1 желтоқсанда алғаш рет жалпыхалықтық сайлау өтіп, егемен Қазақстанның негізін салушы — Нұрсұлтан Назарбаев тұңғыш рет Президент болып сайланды. Ол жылы Н.Назарбаев сайлауға қатысқан 88,2% дауыс берушілердің 98,7% дауысына ие болған еді.
Осылайша, Нұрсұлтан Назарбаев барша халық сайлаған Қазақстанның Президенті мандатын тұңғыш рет иеленді. Тұңғыш Президенттің қызметіне ресми кірісуі мен Елбасының ант беру рәсімі 1991 жылдың 10 желтоқсанында өтті. Ал осыдан 6 күн өткенде Қазақстан Республикасы әлемге өз Тәуелсіздігін жариялады.
***
Осы орайда 2011 жылғы 10 желтоқсанда ҚР Парламенті Сенатының толық отырысында «Қазақстан Республикасының мерекелері туралы» Заңына толықтырулар енгізу туралы» заңнамасына қол қойылды.
Қазақстан Республикасының Тұңғыш Президенті күнін атап өту Қазақстан Республикасының алғашқы Президенті – Елбасы Нұрсұлтан Әбішұлы Назарбаевтың мемлекет алдындағы жетістіктерін тану мақсатымен ұйымдастырылған.
***
Бұл мереке еліміз бойынша тұңғыш рет «Қазақстан Республикасының мерекелері туралы» Заңына толықтырулар енгізу туралы» заңнамасы қолданысқа енгеннен кейін бір жылдан соң, яғни 2012 жылы 1 желтоқсанда атап өтілді. Бұл күн жалпыхалықтық демалыс күніне айналды. Мерекелік салтанат ең алдымен Ақорда төрінен басталып, өңірлерде жалғасын тапты.
***
Тұңғыш Президент күні мерекесінің тек бесінші жылында ғана Елбасы Нұрсұлтан Назарбаевтың атына көше беру туралы зиялы қауым тарапынан ұсыныс жасалды. Алғашқы рет 2017 жылы 1 желтоқсан қарсаңында Алматы қаласындағы Фурманов көшесіне Назарбаев есімі берілгені туралы ресми түрде жария етілді.
***
1 желтоқсан – Тұңғыш Президент күні қоғамға жаңа мерекелік атрибуттар мен жаңа туындылар әкелді. Басты атрибут – Қазақстан Республикасының Тұңғыш Президенті Нұрсұлтан Назарбаевтың портреттері, Елбасының нақыл сөздері жазылған үлкен билбордтар, көшедегі мерекелік құттықтаулар. Ал осы басты атрибуттарды толықтырып отыратын мерекелік концерт, Елбасына арналған шығармалардың тұсаукесерлерін, патриоттық ән-жыр кештерін ұйымдастыру, тарихи кинотуындылар түсіру сынды игі дәстүр қалыптасты. Сондай-ақ бұл күн жер-жерлерде жаңа нысандар ашылып, жаңа пәтерлер берілетін, жаңа атау қойылатын мерекеге айналды.
Әзірлеген Әлібек КЕМЕЛХАН, «Семей таңы»{jcomments off}
