Жастар жылы аясында сейсенбі, 26 қараша күні Семейде қалалық ішкі саясат бөлімінің қолдауымен, «Шығыс жастары» қоғамдық қорының ұйымдастыруымен ауыл жастарының форумы өтті. Форум Абай кітапханасында өткен семинар-тренигтен басталды. Оған Семей қаласына қарасты он төрт ауылдық округтен сексенге жуық жас қатысты.
Жастар форумының ашылу салтанаты Абай атындағы облыстық әмбебап кітапханада өтті. Форум жұмысына жастар ұйымдары өкілдері, қалалар мен аудандардағы жастар ресурстық орталықтары директорлары мен SMM бөлімі мамандары, жастар мәслихаты депутаттары мен хатшылары, жоғары оқу орындары мен кәсіпорындардағы жастар ісі комитеті жетекшілері, жоғары және орта арнаулы оқу орындары студенттері, жас отбасылар, еріктілер мен белсенді жастар қатысты.
Іс-шара барысында қаты- сушылар «Тәуелсіздік және Тұңғыш Президент» тақы-рыбындағы Елбасының шығар-малары қойылған суретті кітап көрмесін тамашалады. Осыдан соң арнайы төрт жұмыс тобы құрылып, тренерлердің көмегімен семинар-тренингтер ұйымдастырылды. Мәселен, ҚазИГЗУ-де «Жастар ресурстық орталықтарының тиімділігін арттыру» тақырыбы бойынша, қалалық ақпараттық орталықта SMM, копирайтинг бойынша семинар-тренинг болып өтті.
Ал Абай кітапханасындағы оқыту семинары «Мемлекеттік және халықаралық гранттар конкурстарына жастардың үкіметтік емес ұйымдардың атынан қатысуы» деп аталса, аталмыш кітапхана жанынан ашылған «Білім орталығы» коворкинг-орталығындағы семинар-тренинг «Жастармен жұмысты ұйымдастыру: әдістері, формалары» тақырыбына арналды.
Барлық жұмыс топтары бойынша жастардың қатысу белсенділігі анағұрлым жоғары болғанын айта кету ләзім. Мәселен, тренер Айдын Қайырбекұлы өткізген жиында арнайы гранттар конкурсына жастардың үкіметтік емес ұйымдар атынан қатысуы мәселелері қозғалды. Бұл ретте тәжірибелі тренер гранттар конкурсына қатысу үшін қандай іс-шаралар жүргізу керектігін түсіндіріп өтті. Сонымен қатар жоспар құру, жоба әзірлеуде көзделетін негізгі мақсат және оны қорытындылау туралы мағлұматтар берді.
Өз сөзінде жоспар құруда шетелдік әдіс-тәжірибелерге сүйену де артықтық етпейтінін айтқан Айдын Қайырбекұлы қазіргі кезеңде қазақ жастарына әлі де болса сауаттылық жетіспейтіндігін атап өтті. Сонымен қатар грантты ұтып алу үшін конкурс шарттарын дұрыс орындау мәселесі жайында да айтылып, әлеуметтік жобаларды әзірлеу мен мемлекеттік тапсырыстарды орындау үшін еліміздің қолданыстағы заңнамасын білудің маңызына да тоқталды.
Семинар-тренингте сондай-ақ мемлекеттік емес ұйымдар үшін берілетін гранттарға қол жеткізудегі қиындықтар мен оны жеңудің жолдары туралы да айтылды.
Ауыл жастарына кәсіпкер-ліктің қыр-сырын үйрету мақсатында «Шығыс жастары» қоғамдық қорының ұйым-дастыруымен өткен семинар-тренингте сөз алған «Шығыс жастары» қоғамдық қорының директоры Айдос Төлеуханов:
— «Шығыс жастары» қоғамдық қоры Жастар жылы аясында Семей қаласына қарасты он төрт ауылдық округте түрлі тақырыпта шеберлік-сыныптарын, спорттық ойындар өткізіп келеді. Жыл соңында белсенділік танытқан ауыл жастарының үздіктерін Семей қаласына шақырып отырмыз. Олар бүгін кәсіпкерлік негіздерін үйрететін семинар-тренингке қатысатын болады. Сонымен қатар «240 сағат ауылда» жобасы негізінде қала жастарын ауылға апарып, тыныс-тіршілігімен таныстырдық. Олар қой бағу, сиыр сауу, малға шөп салу сынды күнделікті тірлікпен танысып, ауыл жастарымен етене араласып кетті,- дейді.
Бүгінде ауылдағы жастардың саны аз болғанымен, олар да өз кәсіптерін бастай алады. Бұл үшін «Жас кәсіпкер», «Бастау бизнес» жобалары жүзеге асуда.
— Ауылда да бизнесті дамытуға болады. Мәселен, тіл үйрететін орталықтар, компьютер орталықтары, шаштараз сұранысқа ие. Ауыл жастарына осындай семинар-тренингтер мен шеберлік сыныптары өте қажет деп ойлаймын, — дейді Шақаман ауылан келген қатысушы Әлия Рахымғалиева.
Семинар-тренингті қаламыз-дағы «Intellectuall» білім беру орталығының директоры Еркебұлан Тұрсын жүргізіп, тәжірибесімен бөлісті. Жас кәсіпкердің айтуынша, кәсіп бастайтын адамға ең алдымен сенімділік қажет. «Сен өз кәсібіңе күмәнмен қарасаң, өзгелерді де сендіре алмайсың»,- дейді Еркебұлан Тұрсын.
Семинар-трениг соңында барлық қатысушыларға сертификаттар табысталды.
Азамат ЕРСАЙЫН, «Семей таңы»{jcomments off}
