27 қараша, сәрсенбі күні Семейде «Жас сарбаз» сыныптарының салтанатты жиыны өтіп, қалалық Қорғаныс істері жөніндегі басқарма мен білім бөлімі әскери-патриоттық тәрбие беру саласындағы ынтымақтастық туралы меморандумға қол қойды.
Елбасы Нұрсұлтан Әбішұлы Назарбаевтың халыққа Жолдауында айтылған міндеттерді жүзеге асыру аясында биыл Семей қаласындағы он үш мектепте «Жас сарбаз» сыныптары ашылды. Бүгінгі күні 425 бала алғашқы әскери даярлық пәнінің негіздерін үйренуде.
— «Жас сарбаз» сыныптарын ашудағы мақсат – оқушыларға патриоттық тәрбие бере отырып, әскери салаға баулу. Семейде алғашқы кадет сыныбы 2016 жылы №40 мектепте ашылған болатын. Осы мектептен үлгі ала отырып, оқу бағдарламасын енгіздік. «Жас сарбаз» сыныптарында сабақ кешке дейін жүреді. Оқушылар күндіз сабақ оқыса, түстен кейін алғашқы әскери даярлық пәнінен дайындалады. Кадет сыныбында оқитындар 9 сыныптан кейін Алматы, Шымкент, Қарағанды қалаларындағы әскери оқу орындарында, сондай-ақ 11 сыныпты тамамдаған соң өзге де әскери оқу орындарында оқи алады,- дейді Алғашқы әскери дайындық орталығының жетекшісі Бекен Үкібасов.
Басқосу барысында жас сарбаздарды қала әкімінің орынбасары Айдар Садырбаев құттықтады.
— Бұл — жас өрендерімізді өмір атты ұлы жолға дайындаудың алғашқы қадамы. Егемен еліміздің еңсесін тіктеп, тұғырлы тәуелсіздігімізді одан әрі нығайту жолында мұндай іс-шаралардың жас буын үшін қажеті ерекше, — деді Айдар Серікқазыұлы.
Қалалық қорғаныс істері жөніндегі басқарма мен білім бөлімі әскери-патриоттық тәрбие беру саласындағы ынтымақтастық туралы меморандумға қол қойған соң, кадеттер салтанатты түрде ант қабылдады.
Шара мерекелік концертке жалғасты.
Жадыра ТӨЛЕГЕНҚЫЗЫ, «Семей таңы»{jcomments off}
