Жуырда қаламыздағы экономика лицейінде қалалық білім бөлімінің ұйымдастыруымен «Отбасы-Мектеп-Қоғам» атты тақырыпта дөңгелек үстел болып өтті. Аталмыш басқосуға атқарушы билік өкілдері мен қамқоршылық кеңес және шаһардағы ұйымдар төрағалары, білім беру мекемелерінің басшылары, ата-аналар қауымдастығының өкілдері жиналып, бала тәрбиесі мәдениетін қалыптастыру бойынша келелі кеңес өткізді.
Диалог, пікір алмасу форматында өткен жиында негізінен отбасы, мектеп және қоғам арасындағы бала тәрбиесіне байланысты ықпалдастық мәселелері кеңінен сөз болды. Сөз алғандар әуелгі кезекте бала тәрбиесіне жауапты тұлғалардың, оның ішінде педагогтар қауымының кәсіби біліктілігі туралы ғана емес, заманауи әдістемелік тәсілдердің тиімділігі және ата-анамен байланыста болудың маңыздылығы жайында да пікір өрбітті.
Сонымен қатар, белсенді азаматтық қоғам қалыптастырудағы балаларға берілуі тиіс патриоттық тәрбие туралы тұшымды көзқарастар мен ғылыми негіздегі дәйекті тұжырымдамалар ортаға салынды. Мұнымен қатар, өскелең ортада адами құндылықтарды дәріптеу мен жастар санасына адамгершілік туралы ұғымдарды сіңіре отырып, олардың коммуникативті, жан-жақты дамыған тұлға болып қалыптасуы үшін атқарылар маңызды іс, кешенді шаралар жайы да әңгіме тиегіне айналды.
Аталмыш тақырыпта сөз алғандар арасында Шәкәрім атындағы университеттің геодезия және құрылыс кафедрасының профессоры Алексей Коновалов келелі баяндама жасады.
– Мен сіздердің назарларыңызға тақырып аясында бірнеше әдістемелік материалдар ұсынғым келеді. Отбасы, мектеп және қоғам арасындағы ықпалдастық бұл әлемдік деңгейдегі аса күрделі мәселе. Бұл ретте біздің әлеуметтік орталық жиі-жиі қаламыздағы мектеп түлектерінің және студент жастардың арасында сауалнама жүргізеді. Олардың барлығы да бірауыздан мектептегі берілетін тәрбиеге баса назар аудару керектігін алға тартады. Әлеуметтану тұрғысынан қарастырсақ, мәдениет дегеніміз білім және оны тиімді пайдалана білу деген ұғымды білдіреді. Ал, білім дегеніміз аясы өте кең ұғым. Осы ретте айтарым, бала тәрбиесінде, оның бойында ізгі қасиеттер мен қатар мәдениет қалыптастыруда мектеп пен отбасы және оның қоршаған ортасының қосар үлесі аса мол, – деп дәйекті пікір білдіріп өткен профессор тақырып төңірегінде бірқатар ой өрбітті.
Қалалық білім бөлімінің басшысы Наталья Фесенко да сөз алып, қазіргі таңдағы еліміз бойынша қолға алынып отырған білім мен тәрбие беру мәселелері төңірегінде пікір білдіріп, басшы ретіндегі өз ойын жеткізді.
Басқосу барысында сонымен қатар білім бөлімінің мамандары, педагогтер қауымы, мектеп директорлары, қоғам белсенділерімен бірге берекесіз отбасылар мен толық емес жанұялар балаларына тәрбие беру жайын да тақырып өзегіне айналдырды.
Ал, жиын соңында барша қатысушылар бала тәрбиесіне тек мектеп пен ата-аналар қауымы ғана емес, бүкіл қоғам мен оның әрбір мүшесі жауапты деген тоқтамға келді.
Әлібек КЕМЕЛХАН, «Семей таңы»{jcomments off}
