Өткен аптаның жұмасы күні ҚР Мәдениет және спорт министрлігінің бастамасымен қолға алынған республикалық «Музейлер шеруі» акциясы аясында Абайдың «Жидебай — Бөрілі» мемлекеттік қорық-музейінде «Жаздым үлгі жастарға бермек үшін» тақырыбымен «Музей түні» шарасы өткізілді.
Осынау ерекше мәнге ие шараның салтанатты ашылу рәсіміне қазақ халқының көрнекті тұлғалары — жазушы Сәуле Досжан, генерал-полковник Сәт Тоқпақбаев, ҚР Мемлекеттік сыйлығының иегері, ақын Тыныштықбек Әбдікәкімұлы және Қожа-Ахмет Яссауи атындағы қазақ-түрік университетінің Еуразия ғылыми-зерттеу институты директорының орынбасары Суат Бейлур сынды мәртебелі қонақтар, сондай-ақ Семей қаласының тұрғындары мен қала меймандары, мәдениет және өнер мекемелерінің қызметкерлері, жас ақындар мен өнерпаздар, студенттер мен оқушылар, зиялы қауым өкілдері арнайы келіп қатысты.
«Музей түні» мәдени-көпшілік шарасы аясында қаламыздағы жас өнерпаздар мен әр саланың білікті мамандарының шығармашылығымен және еңбек жолымен етене жақын танысуға бағытталған іс-шаралар да ұйымдастырылды. Атап айтсақ, жыр әлемінде өзіндік өрнегі бар жас өнерпаздар Бауыржан Игілікпен, Мадияр Жақсылықовпен кездесу ұйымдастырылып, «Музейге сый» акциясы, «Фотоаймақ» және «Алмас қылыш» кинофильмдерінің көрсетілімі өткізілді.
Аталған акцияға облысымызға қарасты Аягөз, Шар, Семей қалалары және Абай ауданының тұрғындары елеулі үлес қосып, Абай музейінің қорына жиырмаға жуық жәдігер тапсырылды.
Сонымен қатар акцияға қатысушы қонақтар қазақ халқының тұрмыс-тіршілігіне, сондай-ақ абайтануға қатысты бағалы дүниелердің құндылығы мен ерекшелігі жайында кең көлемде мағлұматтар берді.
«Музей түні» шарасының салтанатты ашылу рәсімінде ұлттық құндылықтарымызды насихаттап жүрген бірқатар жандарға Абай шаңырағы атынан айрықша құрмет көрсетіліп, алғыс хаттар табысталды.
«Музей түні» аясында қонақтар арасында танымдық ойындар өткізілді. Ойынға қатысушылар «Қырандар» және «Ұландар» тобы болып бөлініп, өздерінің Абайдың өмірі мен шығармашылығы жайындағы білімдерін көпшілік алдында көрсетуге мүмкіндік алды.
Ойынға қызығушылық танытқан жастар мен мектеп оқушылары берілген тапсырмаларға жауап беріп, музей ұжымы әзірлеген бағалы сыйлықтарға ие болды.
Ал жас қонақтар арасында қазақ халқының ұлттық ойыны асық атудан жарыстар өткізілді. Сайыс алдында балалар мен жасөспірімдердің қызығушылықтарын тудырған бұл ойынның ережесі, асық ату әдісі мен тәсілдері түсіндірілді. Жарысқа түсіп, ептілігімен және мергендігімен танылған балаларға бағалы сыйлықтар мен Абай музейіне тегін кіру билеті табысталды.
Десек те аталмыш шараның басты ерекшелігі Абай музейі мен Еуразия ғылыми-зерттеу институты арасындағы меморандумға қол қою рәсімі болды десек қателеспейміз.
Шығармашылық ынтымақтастық пен байланысты дамытуға бағытталған бұл меморандум «Музей түні» мәдени-көпшілік шарасы шеңберінде жүзеге асырылып, аталған шараға Қожа-Ахмет Яссауи атындағы қазақ-түрік университетінің Еуразия ғылыми-зерттеу институты директорының орынбасары Суат Бейлур мен Абай музейінің директоры Жандос Әубәкір қатысып, қол қойды.
Аталмыш құжаттың алдағы уақытта абайтану мен ғылыми-танымдық іс-шаралар жоспарының жүзеге асырылуына септігін тигізері анық деп білеміз.
Өз тілшіміз{jcomments off}
