Өткен жұма, 20 желтоқсан күні Абай театрында Елбасының «Рухани жаңғыру» бағдарламасы аясында ШҚО әкімдігінің қолдауымен жарық көрген «Абай әлемі» кітаптар топтамасының кезекті тұсаукесер рәсімі өтті. Жоба Қазақстанның мәдениеті мен әдебиетін дамытуға, өлкемізден шыққан тұлғаларымыздың атын әйгілеуге, көркем әдебиет арқылы жастарды отансүйгіштікке тәрбиелеуге бағытталған.
Кітаптар топтамасында шығыс өңірінен шыққан ақын-жазу-шылардың, өнер адамдарының әртүрлі әдеби жанрды қам-титын түрлі тақырыптардағы шығармалары жарық көрген. Қызығушылық танытқан оқырман алдағы уақытта кітаптарды облыстағы кітапханалардан және ҚР ҰЭК қорынан оқи алады. Ақын-жазушылардың шығармаларын бағалау және жариялау жөніндегі кеңеске жазушы, КСРО, Қазақстан Жазушылар одағының мүшесі, «Құрмет» орденінің иегері Медеу Сәрсеке жетекшілік етуде.
«Абай әлемі» кітаптар топтамасының биылғы, екінші басылымында Нұр-Сұлтан қаласындағы «Фолиант» баспасынан 9 жеке автордың кітабы мен 3 шығармалар жинағы — барлығы он екі кітап 6500 данамен жарық көрді. Орыс халқының Императорлық жағрафиялық қоғамының Батыс-Сібір Семей бөлімшесі мүшелерінің Шығыс Қазақстан туралы ХІХ-ХХ ғасырларда жазған зерттеулері «Краеведы ХІХ-ХХ веков о восточном Казахстане» деген атпен тұңғыш рет жеке жинақ болып орыс тілінде, өлкетанушы, шежіреші Станислав Черныхтың архив материалдары мен әдеби деректер негізінде дайындалған еңбектері жеке кітап ретінде басылып шықты. Бұдан басқа ұлы Абайдың ақындық үлгісін жалғастырған дарынды шәкірті Нұрлыбек Баймұратовтың, танымал айтыскер ақын Қалихан Алтынбаевтың шығармалары, 2018 жылғы Мемлекеттік сыйлықтың иегері Тыныштықбек Әбдікәкімовтің философиялық өлеңдері, Ба-қытжан Раисованың лирикалық өлеңдері, Көпен Ерқасовтың таңдаулы шығармалары, қаламгер Айтмұхамбет Қасымовтың төл туындылары, жерлесіміз, танымал жазушы Георгий Гребенщиковтің көшпелі қазақтардың өмірі жайлы этнографиялық очерктері мен повестерінің аудармасы қазақ тілінде жарық көрді.
Мемлекеттік «Серпер» сый-лығының лауреаты, «100 жаңа есім» республикалық жобасының жеңімпазы Ержан Жұмабек және Ольга Асташенко, Медет Божан, Наталья Викс, Жасұлан Мақай сынды шығысқазақстандық жас таланттардың шығармалары «Жастықтың оты жалындап» деген атпен жарық көрсе, «Дарын» мемлекеттік сыйлығының иегері Мерей Қарт пен халықаралық байқаулардың лауреаттары Бау-ыржан Игілік, Қызырбек Дүр-гінбайұлы, Александр Мещеряков тәрізді жас ақындардың туындылары жеке кітап болып оқырмандармен қауышты.
– Тұғырлы Тәуелсіздікке қол жеткен уақыттан бастап қазақ халқы өзінің дәстүр-салтымен, рухани қазынасымен қайта қауышты. Ұмыт болған ұлы есімдер қайта оралды. Облыс әкімі Даниал Ахметовтің қолдауымен екінші жыл қатарынан Елбасының «Рухани жаңғыру» бағдарламасы аясында «Абай әлемі» кітаптар топтамасын шығаруды қолға алдық. Бұл жоба ұлы Абай, кемеңгер Шәкәрім, дана Мұхтар шығармаларын шығарудан бастау алып, қазақ әдебиеті тарихынан маңызды орын алатын бірқатар қаламгерлердің шығармалары және Жастар жылы аясында дарынды жастардың шығармалары жарық көрді. Келер жылы ұлы Абайдың 175 жылдық мерейтойына арнап «Абай әлемі» жобасын жаңа кітаптармен толтыру жоспарланып отыр. Осы сәтті пайдаланып, белгілі жазушы, біздің жерлесіміз Медеу Сәрсеке ағамызға және жобаны жүзеге асырған редакция ұжымына үлкен жұмыс атқарғаны үшін зор алғыс білдіремін,- деді қала әкімі Ермак Сәлімов.
Шара барысында «Невада — Семей» антиядролық қозғалысының 30 жылдығына орай жарық көрген ақын, жазушы, Қазақстанның еңбек сіңірген қайраткері Сәуле Досжанның «Қасірет пен тағдыр» атты қазақ және орыс тілдеріндегі романы таныстырылды.
Айта кетейік, өткен жылы жазушы Медеу Сәрсекенің жетекшілігімен, ШҚО әкімдігінің қолдауымен «Абай әлемі» топтамасымен он алты кітап жарық көрген болатын. Келер жылы, Абайдың 175 жылдық мерейтойына орай, ұлы ақынның таңдаулы шығармалары, Кәкітай Ысқақұлы, Көкбай Жанатайұлы, Әлихан Бөкейханов, Ахмет Байтұрсынов, Мұхтар Әуезов, Қайым Мұхамедханов, Сәбит Мұқанов, Зәки Ахметов, Әріп Тәңірбергенұлы, Мағауия Абайұлы, Тұрағұл Абайұлы, Әсет Найманбаев, Шәкір Әбенов және басқа да тұлғалардың шығармалары жинақталған кітаптар топтамасын шығару жоспарлануда.
Жадыра ТӨЛЕГЕНҚЫЗЫ, «Семей таңы»{jcomments off}
