Семей қалалық қаржы бөлімінің
басшысы Роза Кәкімова:
ӘЙЕЛ ЖАНЫ ӘДЕППЕНЕН ӘДЕМІ
— Роза Құдайбергенқызы, Сіз үшін 8 наурыз несімен ерекшеленеді?
— Шұғылалы көктемнің шуақты мерекесі ғой. Қыс аяқталып, көктемнің лебі сезіледі. Көктемде тіршілік оянып, айнала жаңарады. Адамзат баласының бойында көктеммен бірге бір мейірім, жылылық, тіпті, белсенділік ояна бастайды. Көктемнің алғашқы мерекесі – 8 Наурыздың орыны бөлек. Бұл мерекенің тек нәзік жандар үшін ғана емес, бүкіл адамзат баласына ерекше қуаныш сыйлайтыны сөзсіз. Себебі, бұл күн — әлемді мейірімділік пен сұлулыққа бөлеген әйел-аналар мерекесі. Барлығымыздың аналарымыздың, әпке-сіңлілеріміздің мерекесі.
— Осы айтулы мерекеде ең бірінші кімді құттықтайсыз?
— Әрбір адам баласы үшін ананың алақанының жылуынан артық ештеңе жоқ қой. Мереке күні ең алдымен анамды мерекесімен құттықтап, жылы лебізімді білдіруге асығамын.
Ерекше есіңізде қалған 8 наурыз мерекесі және ерекше сый…
— Мен үшін өмірдегі ең үлкен, ерекше сый ұлымның бірінші сыныпта оқып жүргенде қолдан жасап сыйлаған мерекелік ашықхаты. Сол кезде өте қатты қуандым, ұлымның бал-бұл жанған жүзі әлі есімде. Әр мереке сайын баланың берген әр сыйы ана үшін қымбат, мәңгі жадында жатталады.
— Қоғамдағы әйел-ананың рөлі туралы не айтасыз?
— Қазіргі таңда нәзік жандылар барлық салада белсенділік танытуда. Ең ауыр деген жұмыстарға аналар араласады. «Қыздың қырық жаны бар» деген ғой, халқымыз. Әйел адам өмірге ұрпақ әкеліп, бала тәрбиелеп, отбасы-ошақ қасында ғана отырған жоқ, еңбекке де араласуда. Қоғамда тың идеялардың туындауына да себепкер. Бұл өте дұрыс деп ойлаймын. Әйел адам жүрген жерде жинақылық, тәртіп болады. Нәзік жанды басшы болса, ол ана ретінде ұжымға мейіріммен қарайды. «Бұлақ көрсең көзін аш» демекші, жастар болса, жігерлендіруге тырысады, ана ретінде қолдау көрсетеді.
— «Нәзік жанды» сұлулықтың символы іспетті. Сіз сұлулығыңызды қалай сақтайсыз? Сұлулық салондарына барасыз ба?
— Уақыт тапшы ғой, десе де, сұлулық салондарына жиі барамын. Сыртқы келбетіме мән беремін. Әйел заты тән сұлулығымен ғана масаттанбауы керек, ішкі рухани жан дүниесі де әдемі болуы керек.
{jcomments on}- Сөзіңіз аузыңызда, рухани дүниеңізді молайту үшін жиі кітап оқисыз ба? Қандай шығармаларды ұнатасыз?
— Демалыс кезінде сапарға шықсам, серігім ретінде «Абай жолы» роман-эпопеясын өзіммен бірге алып жүремін. Қанша мәрте оқысам да, ол кітаптың берер тағылымы мол. Сонымен қатар, түрлі шығармашылық әдебиеттен басқа психологиялық жанрдағы кітаптарды жиі оқимын. Әр адамның өз сыры болады дегендей. Бұл жанрдағы кітаптарды оқып жатқаным – жалпы адамзат баласының жан дүниесін тану қызмет бабында септігін тигізеді.
— Сіздің ойыңызша, адамзат баласының бойында қандай қасиет болуы керек?
— Мінез-құлық – адам бойына сүтпен кіріп, сүйектен шығатын қасиет дейді ғой. Ең басты қасиет әдептілік деп санаймын. Жеке бастағы әдептілік көп ретте оның қарапайымдылығын, имандылығын танытады.
— Биылғы мерекеден қандай сый күтесіз?
— Биыл осындай сый күтемін деп айта алмаймын, құпия болсын. Бірақ, әрбір нәзік жанды үшін 8 Наурыз бен туған күні ерекше мейрам. Бұл күні жақын адамдарымыздан сый күтетініміз рас. Бірақ, қандай сый болмасын, сыйлық жасаушы адам өзінің ойымен, жақсылық нышанымен сыйлық жасаса, ұнатпауға хақым жоқ, қуана қабыл аламын.
— Гүлдің қандай түрлерін ұнатасыз?
— Көктем мезгілінде қызғалдақты, ал басқа мезгілдері, әрине, раушан гүлін ерекше ұнатамын.
— Бөлме гүлдерін өсіру сүйікті ісіңізге жата ма?
— Иә, бөлме гүлдерін өсіру де сүйіп атқаратын істерімнің қатарынан. Бөлме өсімдіктері тамаша эстетикалық ләззат сыйлайды. Ал, оны күтіп-баптау адамға жағымды әсер етеді. Аналарымыз бізге үйреткендей, әйел бар үйде терезенің алды бос тұрмауы керек. Өйткені, ол жылылық, мейірімділік пен ізгілік және адам баласының табиғатпен етене байланысының айғағы.
— Әңгімеңізге рахмет!
Сұхбаттасқан Әйгерім СӘРСЕНҒАЛИ.
