Жуырда ҚР Мәдениет және спорт вице-министрі Нұрғиса Дәуешов, Абай Құнанбайұлының 175 жылдығына орай, Бөрілідегі М.Әуезовтің музей-үйі мен Жидебайдағы Абай музей-үйіне, «Абай — Шәкәрім» мавзолей кешеніне және Семей қаласындағы бас музейге мерейтойға дайындық және өткізу шараларының барысымен танысып, алдағы ұйымдастыру жұмыстарын жан-жақты талқылау мақсатында іссапармен барып қайтты.
Іссапар барысында Абайдың «Жидебай — Бөрілі» қорық-музейінде ҚР Мәдениет және спорт вице-министрі Н.Дауешовтің төрағалығымен Абай Құнанбайұлының 175 жылдық мерейтойын өткізу жоспарын таныстыру және Абайдың «Жидебай — Бөрілі» мемлекеттік қорық-музейінің жаңа экспозициясын жасақтауға байланысты жиын өткізілді.
Жиынға абайтанушы, ф.ғ.д., профессор, Семей қаласының Шәкәрім атындағы мемлекеттік университеті ректорының кеңесшісі Арап Еспенбетов, Абай ауданының Құрметті азаматтары — М.Жанболатов, А.Мұқатаев, О.Кәрібжанов, Б.Орынбаев, М.Толғанбаев, Л.Гумилев атындағы ЕҰУ жанындағы «Абай академиясы» ғылыми-зерттеу орталығының директоры Е.Сайлаубай және Семей қаласы әкімінің орынбасары Айдар Садырбаев және шаһардағы зиялы қауым өкілдері қатысты.
Нұрғиса Маратұлы жиналған қауым алдында сөз алып, Абайдың 175 жылдығына даярлық жұмыстарын ширатудың қажеттілігі жайында келелі пікір білдірді. Мәртебелі мейман мұнымен қатар өз сөзінде Семей қаласының зиялы қауым өкілдеріне Абай Құнанбайұлының 175 жылдық мерейтойын дайындау және өткізу жөніндегі жалпыреспубликалық жоспармен таныстырды.
Айта кетер болсақ, жалпыреспубликалық жоспарда хакім Абайдың мұрасын насихаттауға арналған халықаралық, республикалық және өңірлік мәдени-көпшілік шаралар өткізу, Абай шығармаларын шет тілдеріне аудару, Абайдың өмірі мен шығармашылығы, мұрасы туралы деректі фильмдер түсіру, ғылыми-танымдық конференциялар, семинарлар мен шетелдерде ұйымдастырылатын іс-шаралар мен көрмелер және тағы басқа әртүрлі форматтағы шаралар жоспарланып отырғанын баса атап өтті. Жалпы, аталмыш шаралардың барлығы да министрліктің назарында тұр.
Осынау жиын барысында Абайдың «Жидебай — Бөрілі» мемлекеттік қорық-музейінің Семей қаласындағы бас ғимаратының Абайдың шығармашылығы мен өміріне арналған жаңа экспозициясының тұжырымдама жобасы таныстырылды.
Республикалық «Абай» қорының президенті, Абай ауданының Құрметті азаматы Отантай Кәрібжанов, Абай ауданының Құрметті азаматтары — Манатай Толғанбаев, шежіреші Молдабек Жанболатов, профессор, абайтанушы Арап Еспенбетов Жидебайдағы Абай музей-үйі, Семей қаласындағы бас музейдің жаңа экспозициясын жасауға қатысты өз пікірлерін білдіріп, Нұрғиса Мұратұлына ұсыныстарын жеткізді.
Жиын барысында айтылған пікірлер мен ұсыныстар алдағы уақытта ҚР Мәдениет және спорт министрлігі тарапынан ескерілетін болады.
Қ.ӘЛІМБЕК.{jcomments off}
