ҚР Парламенті Мәжілісінің Төрағасы Нұрлан Нығматулин Шығыс Қазақстан облысына жұмыс сапары барысында Семей қаласына келді. Нұрлан Зайроллаұлы алдымен «Жидебай-Бөрілі» мемлекеттік тарихи-мәдени және әдеби-мемориалдық қорық–музейіне барды. Қарағайлы шағын ауданында болып, ондағы көпфункционалды мәдени-спорт кешенінің жұмысымен танысты. Одан соң қаладағы Жедел медициналық жәрдем ауруханасына ат басын бұрып, жұртшылықпен кездесу өткізді.
«Жидебай-Бөрілі» музейіндегі экспонаттармен танысып шыққан Мәжіліс Төрағасы Нұрлан Нығматулин Ұлы Абай мұрасы Қазақстан халқының игілігі екенін айта келе қазақ жазба әдебиетінің негізін салушы Абай Құнанбаевтың Қазақстан қоғамының рухани дамуына қосқан үлесі зор екенін атап өтті. Нұрлан Зайроллаұлы Қазақстанның Тұңғыш Президенті – Елбасы Нұрсұлтан Назарбаев пен Мемлекет басшысы Қасым-Жомарт Тоқаевтың Абайдың шығармаларын қазақстандықтар арасында кеңінен насихаттауға баса назар аударып отырғанын еске салды. Мәжіліс Төрағасы Қазақстан Президентінің «Абай және XXI ғасырдағы Қазақстан» мақаласындағы Абайдың шығармашылығы мен Семей қаласының әлеуметтік-экономикалық дамуына қатысты міндеттерінің маңыздылығына тоқталды. Нұрлан Нығматулиннің айтуынша, оларды жүзеге асыру әлемге әйгілі қоғам қайраткерінің 175 жылдығын жоғары деңгейде атап өтуге ғана емес, сонымен бірге еліміздің тарихи және мәдени мұрасының артуына ықпал етеді.
Семейге жұмыс сапары барысында Нұрлан Нығматулин Қарағайлы шағын ауданына барып, ондағы көпфункционалды мәдени-спорт кешенінің жұмысымен танысты. Мәжіліс Төрағасы бұл кешен барлық халықаралық стандарттарға сәйкес келетіндігін және әртүрлі маңызды іс-шаралар мен бос уақытты бүкіл отбасымен өткізуге мүмкіндік беретінін атап өтті.
Бұдан соң ҚР Парламент мәжілісінің төрағасы Семейдегі жедел жәрдем ауруханасына ат басын тіреп, жұртшылықпен кездесу өткізді.
Жиында «Халық денсаулығы және денсаулық сақтау жүйесі туралы» кодекс жобасы талқыланды.
– Бұл күндері Парламент Мәжілісінің депутаттары облыс орталықтарында, қалаларда көптеген кездесулер өткізуде. Бұл біз үшін өте маңызды кері байланыс, өйткені бұл депутаттарға заң шығару саласындағы мәселелерді білуге және Үкіметпен бірлесіп, ел азаматтарының өмір сүру сапасын жақсартуға жағдай жасауға мүмкіндік береді. Осы жылы мен жұмыс сапарымды Шығыс Қазақстан облысынан, Семей қаласынан бастағанды дұрыс деп санадым. Бұл кездейсоқтық емес, биыл біз ұлы ақын Абай Құнанбаевтың 175 жылдығын атап өтеміз. Президент Қ.Тоқаев Семей қаласына қатысты бірқатар тапсырмалар берді. Енді Семей тарихи орталық мәртебесіне ие болады. Қаланы әлеуметтік-экономикалық тұрғыда жан-жақты дамытуға байланысты жұмыс жүргізіледі. Бірқатар тарихи нысандар жаңғыртылады. Семей қаласын көптеген оң өзгерістер күтіп отыр. Қажет болған жағдайда, осы жұмыстарды жүзеге асыруға Парламент депутаттары заңнамалық деңгейде белсенді түрде қатысатынын айтқым келеді,- деді Нұрлан Нығматулин.
Қазір «Халық денсаулығы және денсаулық сақтау жүйесі туралы» кодекс жобасы Парламент депутаттарының қарауында. Нұрлан Нығматулин аталған құжаттың маңыздылығын атап өтті.
– Заң жобасында аурудың алдын алу, дәрігерге дейінгі және медициналық көмек көрсету саласындағы көптеген жаңашылдықтар, сондай-ақ трансплантология саласындағы жаңа тәсілдер қарастырылған. Парламентке түскен кодекстің үкіметтік нұсқасы өткен жылдың күзінде қолданысқа енгізілді және де мұқият және жан-жақты қаралып, Мәжілістің барлық комитеттерінде талқыланды. Негізгі жұмыс депутаттар, үкіметтік емес ұйымдар және медициналық қоғамдастықтың өкілдері кіретін жұмыс тобының аясында жүзеге асырылады. Өйткені бұл өте көлемді құжат және мұқият талқылауды қажет етеді. Біз үшін дәрігерлердің кеңестері мен ұсыныстары өте маңызды, – деді Парламент Мәжілісінің спикері.
Нұрлан Нығматулин Шығыс Қазақстанда медициналық кадрларды даярлау жүйесі жақсы жолға қойылғанын атап өтті.
– Мен облыс әкімі Даниал Ахметовтің шығыс аймағындағы медицина саласын дамытудағы рөлін атап өткім келеді. Елордада, «ең жоғары» кеңселерде ол облыстың жағдайын жақсартуға, әсіресе денсаулық сақтау жүйесін дамытуға ерекше назар аударуды талап етеді. Даниал Кенжетайұлы Үкіметпен де, депутаттық корпуспен де тығыз байланыста жұмыс істейді. Бюджеттен бөлінген барлық қаражат тиімді пайдаланылуда, менің ойымша, аймақ тұрғындары мұны біледі,- деді Нұрлан Нығматулин.
Жұртшылықпен кездесуде сонымен қатар трансплантология, өмірді жасанды қолдау, профилактикалық егулер, скринингтік зерттеулер және балаларды профилактикалық медициналық тексерулер туралы мазмұнды әңгіме болды.
Жүздесу соңында Парламент Мәжілісінің спикері халықты кодекстің жобасын – еліміздің денсаулық сақтау саласына қатысты негізгі құжатты талқылауға белсене қатысуға шақырды.
Семей қаласының ақпараттық орталығы{jcomments off}
