ҚАЛАМЫЗДАҒЫ ЕМХАНАЛАР МӘМС ЖҮЙЕСІНЕ ДАЙЫН
Апта дүйсенбісінде Семейге жұмыс сапарымен ҚР Денсаулық сақтау министрлігінің жауапты хатшысы Ботагөз Жекселекова келіп, бірқатар денсаулық сақтау мекемелерінде болды.
Елімізде 2020 жылдың 1 қаңтарынан бастап міндетті әлеуметтік медициналық сақтандыру жүйесі енгізілді. Ағымдағы жылдың 1 сәуіріне дейін еліміздегі барлық азаматтар шартты түрде сақтандырылған. Сол себепті адамдар осы уақытқа дейін тегін медициналық көмектің кепілдік берілген көлемі мен міндетті әлеуметтік медициналық көмек пакетіне сүйенетін медициналық қызметтерді ала алады. Оған дейін тұрғындар нақты мәртебесін анықтап алулары шарт.
Айта кетейік, сақтандыру пакетіне барлық жоспарланған медициналық қызметтер кіреді: оңалту және қалпына келтіру емі, мамандардың консультативтік-диагно-стикалық көмегі, стационар-лық көмек, амбулаторлық дәрі-дәрмектер және басқа медициналық қызметтер. Кепілдендірілген тегін пакетке барлық жедел медициналық, паллиативті, алғашқы медициналық және жедел жәрдем көмегі кіреді. Сонымен бірге созылмалы және қоғам үшін қауіпті аурулары бар пациенттер міндетті әлеуметтік медициналық сақтандыру жүйесіне қатысуына қарамастан, сақтандыру пакетіне толық қол жеткізе алады.{jcomments off}
Өзін-өзі жұмыспен қамтыған азаматтар өздері үшін, ал жұмыс берушілер қарамағындағы қызметкерлер үшін ай сайын МӘМС жүйесіне жарна аударады. Ал азаматтардың 15 жеңілдетілген санаты — балалар, зейнеткерлер, Ұлы Отан соғысының ардагерлері, мүгедектер, көпбалалы аналар және тағы басқалар мемлекет есебінен сақтандырылады.
— ҚР Үкіметі тапсырмасымен Денсаулық сақтау министрлігі жанынан орталық штаб құрылды. Өткен жылдың желтоқсан айынан бастап МӘМС енгізілуін бақылау мақсатында ел аймақтарында болып, жұмыстар жүргізудеміз. Жаңа жүйеге байланысты мәселелерді тыңдап, ұсыныстарды қарастырудамыз. Семейдегі емханалар МӘМС жүйесіне дайын екеніне көз жеткіздік. Компьютерлермен, тұрақты интернетпен, өзіне-өзі қызмет көрсету бұрыштарымен жабдықталыпты. Жалпы, ШҚО бойынша халықтың 99 пайызы сақтандырылған, — деді Қазақстан Республикасы Денсаулық сақтау министрлігі жанындағы Медициналық көмекті ұйымдастыру департаменті директорының орынбасары Гүлнар Жанғарашева.
Делегация сонымен қатар түсіндіру жұмыстарын да жүргізуде. МӘМС жүйесінде орын алған алғашқы мәселелердің қайталанбауы үшін шаралар қабылдануда.
Мамандар Семейдегі жедел медициналық жәрдем ауруханасында өткен жиында Шығыс Қазақстан облысында міндетті әлеуметтік медициналық сақтандыру жүйесін енгізуге дайындық жұмыстары туралы айтып берді. «Әлеуметтік медициналық сақтандыру» қорының Шығыс Қазақстан облысы бойынша филиалының директоры Ғалымжан Әбілов аймақта міндетті әлеуметтік медициналық сақтандыруды енгізу үшін нормативтік-құқықтық база бекітілгенін мәлімдеді.
— Еліміздегі міндетті медициналық сақтандыру жүйесінде халықты медициналық көмекпен қамту шамамен 87%-ды, ал Шығыс Қазақстан облысында бұл көрсеткіш 86,5% -ды құрайды. Облыс халқының 13,5%-ы шартты түрде сақтандырылмаған, бұл — шамамен 184 мың адам. 2018 жылғы 1 қаңтардан бастап мәртебесін жаңартуды қажет ететін 186 мың облыстың тұрғындарынан тұратын тізім анықталды. Бүгінгі таңда бұл көрсеткіш 34,4 мың адамды құрайды. Жұмыс жалғасуда. Халықтың 86,5%-ы шартты түрде сақтандырылған деп саналады. Мемлекет тарапынан жарна аударылатын азаматтардың 15 әлеуметтік санатына 722 мың адам кіреді. Тұрақты емес төлемдерге келер болсақ, өткен жылы Қорға 43 мың салық төлеушіден 7,3 млрд теңгеден асатын аударымдар жасалды,- деді Ғалымжан Әбілов.
Еске сала кетейік, азаматтар МӘМС жүйесіндегі мәртебесі туралы E.gov порталынан біле алады.
Айтолқын САМАТОВА,«Семей таңы»
