Семей медицина университеті госпиталінің балалар ауруханасында «Сәби» қайырымдылық қорының демеушілігімен шұғыл хирургиялық бөлімше ашылды.
Семейдегі жалғыз балалар ауруханасына күрделі жөндеу 1972 жылы жүргізілген, ал құрал-жабдықтар 1985 жылдан бастап жаңартылмаған. Соған қарамастан, мұндағы ақ халатты жандар өткен жылы ғана балаларға 1400 шұғыл ота жасаған.
– Ауруханада емделушілер өте көп. Семей қаласының бюджеті үлкен емес. Сондықтан құрал-жабдықтар алуға қаржы жақын арада бөліне қоймайтынын ескердік. Жөндеу жұмыстары 2019 жылдың желтоқсанында аяқталып, 8 қымбат қондырғы орнатылды,- дейді «Сәби» қайырымдылық қорының негізін қалаушы және президенті Әсел Тасмағамбетова.
Семей медицина университетінің госпиталі қалаға ғана емес, жақын елді мекендерге де қызмет көрсетеді.
— Операциялық блоктағы жаңа медициналық құрал-жабдықтар құрсақ қуысы, зәр шығару жүйесі мен кеуде қуысы органдарына хирургиялық ота жасауға мүмкіндік береді. Өңірімізде зәр шығару жүйесі мен құрсақ қуысының дамуында ауытқуы бар балалар көп. Бұрын бізде мұндай жабдықтар болмағандықтан, науқастар шұғыл хирургиялық паталогиямен емделіп келді. Енді мұндай оталарды біздің емханада жасауға болады, — дейді балалар хирургі Ерлан Жұмажанов
Айта кетейік, «Сәби» қоры медициналық қызметтердің сапасын арттыру мақсатында 2018 жылы «Шұғыл балалар хирургиясы» жобасын қолға алған болатын. Қор демеушілігімен өткен жылы мамыр айында Алматы қаласында балалар шұғыл хирургиялық бөлімшесі ашылды. Екі нысанға жұмсалған қаражат сомасы 422 млн теңгені құраған.
Өз тілшіміз
{jcomments off}
