Осыдан біраз бұрын Семей қалалық Достық үйінің базасында Еріктілер қозғалысының орталығы ашылған болатын. Бүгінгі таңда аталмыш орталықтың еріктілері 4 бағыт бойынша жұмыс жүргізуге көшті. Семей қаласының еріктілері шаһар бойынша 30-дан астам іс-шара өткізіпті. Солардың ішінде қала көшелері мен жекелеген аулаларды қардан тазарту, спорттық жарыстарды ұйымдастыруға көмек көрсету сынды шараларға жалпы саны екі мыңға жуық волонтер қатысыпты.
Әсіресе спорттық шараларды ұйымдастыру бойынша ҚХА жобасы табысты жүзеге асырылуда. Мәселен, қаламыздағы «Gold King» спорт клубында аз қамтылған отбасылардан шыққан 20 бала тегін түрде шұғылданады. Сол тәрізді Семей қалалық балалар мен жасөсіпірмдердің спорт мектебінде 50 бала тегін оқиды. 30 жасөспірім Таэквон-до федерациясының Шығыс Қазақстан облыстық филиалының секцияларында тегін жаттығады. Мұнымен қатар ШҚО бойынша «Шинкиокушинкай каратэ федерациясы» РҚБ филиалында 30 бала тегін оқытылады.
Айта кетерлігі сол, бұл спорт мекемелерінің басшылары Қазақстан халқы Ассамблеясының волонтерлері болып табылады. Олар осынай іс-шаралар арқылы Қазақстанның болашақ буынын тәрбиелеуге ұзақ мерзімді инвестициялар салуда.
Бұл бағыттағы жұмыстар бойынша Семей қаласындағы Жастар ресурстық орталығының белсенділері #BizBirgemiz! челленджі аясында табысты жұмыстар жүргізуде. Мәселен, олар жуырда шаһарымыздан 30 шақырым жерде орналасқан Мұздыбай елді мекеніне барып, көпбалалы ананың үйінің іргесін қардан тазартып берді. Жауған қар үйдің төбесімен бірдей болғандықтан және сүрленіп қалғандықтан біраз қиындық тудырыпты. Әйтсе де еріктілердің арқасында көпбалалы ана қуанышқа кенелді.
Бұл тек атқарылып жатқан көптеген шаралардан бірер мысал ғана. Ағымдағы жылдың қаңтарынан бастап қаламыз бойынша құрылған еріктілер орталығының белсенділігі өте жоғары.
Өз тілшіміз{jcomments off}
