10 ақпан күні Бесқарағай аудандық Мәдениет үйінде «Ниет» республикалық қорының Семей филиалы және Бесқарағай ауданы әкімдігінің бірлесе ұйымдастыруымен қайырымдылық акциясы өтті. Қайырымдылық акциясы барысында ауданның ауылдық округтерінен 85 отбасы қайырымдылық көмекке ие болды.
Мемлекет басшысы Қасым-Жомарт Тоқаев 2020 жылды Еріктілер жылы деп жариялағаны баршамызға мәлім. Еріктілер жылы аясындағы игі істер Бесқарағай ауданында да сәтті жүзеге асып жатыр. Осы орайда Шығыс Қазақстан облысының әкімі Даниал Ахметовтің тапсырмасын орындау мақсатында әлеуметтік жағынан аз қамтылған және көпбалалы отбасыларға, ата-анасының қамқорлығынсыз қалған балаларға қайырымдылық шаралары ұйымдастырылуда. Соның бір дәлелі — ағымдағы жылдың 10 ақпаны күні Бесқарағай аудандық Мәдениет үйінде «Ниет» республикалық қорының Семей филиалы және Бесқарағай ауданы әкімдігінің бірлесе ұйымдастыруымен қайырымдылық акциясы өтті. Қайырымдылық акциясы барысында ауданның ауылдық округтерінен 85 отбасы (423 адам) қайырымдылық көмекке ие болды. Акцияға мемлекеттік және қоғамдық ұйымдар, аудандық мәслихат депутаттары, аудандық аналар кеңесі, этномәдени бірлестіктердің мүшелері, ауданның еріктілер қозғалысының мүшелері және аудан жастары қатысты.
Шараға қатысқан аудан әкімі Шалқар Заманбекұлы Байбеков қайырымдылық көмек көрсеткені үшін «Ниет» қорына алғысын білдіріп, филиал директоры Айдос Серікқалиұлына алғыс хат табыс етті.
— Биылғы жыл ауданымызда игілікті істермен басталды. «Ниет» республикалық қорының Семей қалалық филиалының демеушілігімен бүгін ауданның ауылдық округтерінен келген 85 отбасы қайырымдылық көмек алып отыр. «Ниет» республикалық қорының Семей қалалық филиалына және директоры Айдос Серікқалиұлына зор алғыс айтамыз. Биылғы Еріктілер жылына сай бастама деп ойлаймыз. «Кең болсаң, кем болмайсың» дегендей, алдағы уақытта да мұндай ізгі істерді жалғастыра береміз. Көпбалалы отбасылар және ата-анасының қамқорлығынсыз қалған балалар әрдайым мемлекет қамқорлығында,- деді аудан әкімі Шалқар Байбеков.
Осыдан соң аз қамтылған және көпбалалы отбасыларға, ата-анасының қамқорлығынсыз қалған балаларға қыстық күрткелер мен қалың киімдер салынған сөмкелер таратылды.
Акция балалардың шығармашылық концертімен аяқталды.
Назира Идрисова, Бесқарағай аудандық ішкі саясат бөлімі{jcomments off}
