Өткен аптаның жұмасы күні «Nur Otan» партиясының Семей қалалық филиалының ғимаратында қала әкімінің орынбасары Николай Ушаков жергілікті тұрғындарды жеке сұрақтары бойынша қабылдады.
Бұл жолы қала әкімі орынбасарының қабылдауына жазылғандардың басым көпшілігі баспана мәселесіне қатысты сұрақтармен келіпті. Олардың арасында егде жастағы адамдар көп болды. Тұрғындардың сауалдарын мұқият тыңдаған Николай Николаевич олардың әрқайсысына кең көлемде түсінік беріп, алдағы уақыттарда заңға сай көмек көрсетілетінін жеткізді.
Дегенмен басым көпшілігіне 2023 жылға дейін өз кезектерін күтулеріне де тура келеді. Бұл ретте тұрғындар сауалына жауап қайырған әкімнің орынбасары:
— Соңғы бес жыл ішінде біз көп қабатты тұрғын үйлер салуға айрықша мән беріп отырмыз. Сәйкесінше, осы уақыт аралығында Семей қаласы бойынша қолданысқа берілген тұрғын үй саны да бұрынғы жылдармен салыстырғанда артып отыр. Ал алдағы уақыттарда, Президент тапсырмасына сай, мұқтаж тұрғындарды баспанамен қамтуға мән берілетін болады. Бұл орайда «Бақытты отбасы» сынды мемлекеттік бағдарламалар аясында бірінші кезекте көпбалалы аналар мен ата-анасыз өскен азаматтардың өтініштері ескеріледі,- деп атап өтті.
Қабылдау барысында Николай Ушаков қазіргі күні пәтерді жекеменшік құқығынсыз ұзақ мерзімге жалға алу сынды тиімді тәсіл жайында, сонымен қатар Тұрғын үй жинақ банкі арқылы аз пайызбен пәтер алу мүмкіндіктері жайлы түсіндірді. Ол үшін аталмыш банк қызметкерлерінен кеңес алу қажет екенін жеткізіп, жеке сұрақтарымен келген тұрғындарға бағыт-бағдар берді.
Қабылдауда болған тұрғындардың кейбірі тұрғын үйлеріне коммуналдық қызмет бойынша толыққанды қызмет көрсетілмей отырғанын айтып шағымданды. Атап айтсақ, Мичурин көшесінде орын тепкен үш қабатты тұрғын үйде орталықтандырылған су мен кәріз желісі орнатылмаған. Осы мәселе бойынша шағыммен келген тұрғынның айтуынша, үй сыртындағы кәріз суының иісі баршаны алаңдатып отыр.
Мәлім болғандай, бұл үйдің кәріз жүйесі орталыққа қосылған емес. Әйтсе де кейбір тұрғындар үйлеріне өз еріктерімен коммуналдық қызметтің қатысуынсыз орнатып алған. Николай Ушаков бұл үйдегі жағдай қала басшылығының назарында екенін жеткізе келіп, рұқсатсыз кәріз жүйесін тартып, лас суды далаға төгу дұрыс еместігін жеткізе келе, бұл сауал қалалық ҚДБ мекемесіне жолданғанын айтты.
Қабылдау барысында аталған тұрғын үйді басқаруға қатысты мәселелер ортақ талқыға түсті. Бұл ретте барлық сауалдарға жауап қайырған қала әкімінің орынбасары «Семей су арнасы» мекемесі басшылығына арнайы тапсырмалар берді. Ал кәріз жүйесі мәселесі бойынша қалалық әкімдік алдағы уақыттарда көмек көрсететін болады. Ол үшін арнайы жер бөлініп, кәріз суы жиналатын септик қазылады.
Сөз соңында Николай Николаевич аталмыш бағыттағы мәселелер бойынша бірінші кезекте тұрғындардың өздері заң шеңберінен шықпауы қажет екенін ескертіп, қалалық әкімдік өтінішпен келген барлық шаһар тұрғындарының талап-тілегін қанағаттандыруға әзір екенін айтты.
Әлібек КЕМЕЛХАН, «Семей таңы»{jcomments off}
