Қауіпсіздік жөніндегі 56-шы Мюнхен конференциясында Қазақстан Президенті Қасым-Жомарт Тоқаев Орталық Азияның жаһандық геосаясаттағы рөлі арта түсетінін атап өтті. Сонымен қатар Қазақстанның сыртқы саясаттағы басымдығы және Ресеймен, Қытаймен, Еуроодақпен, АҚШ-пен, Ауғанстанмен өзара қарым-қатынастары туралы әңгімеледі. Есірткі тасымалына қарсы күрес жөніндегі шараларға, Қазақстанның терроризмге қарсы іс-қимылдарға қосқан үлесіне, «Жусан», «Русафа» операцияларының қорытындыларына егжей-тегжейлі тоқталып, еліміздегі саяси және экономикалық реформалардың негізгі бағыттары туралы айтып берді. Экономиканы әртараптандырудың, инновациялар мен цифрландыруды дамытудың аса маңызды екеніне назар аударды.
Осы сапары аясында Мемлекет басшысы шетелдердің бірқатар ірі компанияларының басшыларымен кездесті. Олар біздің елге инвестиция салуға дайын екендерін жеткізді.
Ел экономикасын дамытуда инвестиция тартудың маңызы зор екені белгілі.
Қасым-Жомарт Кемелұлы әлем жұртшылығы алдында бейбітшілік пен тұрақтылықты сақтауға қатысты келелі пікір білдіріп, көршілес елдермен өзара тиімді қарым-қатынас орнату туралы айтты. Бұл халықаралық жиында Президентіміз өзінің сарабдал саясаткер екенін көрсетті деп ойлаймын.
Біз Президенттің жаңа реформаларын қолдай отырып, зор сенім білдіреміз.
Серік ОРЫНБЕКОВ, Семей қалалық «Nur Otan»
партиясы филиалының партиялық iс-шаралар секторының меңгерушісі {jcomments off}
