комедиясы аналарға мерекелік тарту болды
8 Наурыз — Халықаралық әйелдер мерекесі қарсаңында қала және қалаға жақын ауылдық округтердегі «Алтын алқа», «Күміс алқа» төсбелгілерінің иегерлері Абай атындағы театрда режиссер Е. Дүнгеновтің «Отыз ұлың болғанша» атты комедиясын тамашалауға арнайы шақырылды. Қойылым басталмас бұрын қала әкімінің орынбасары, Семей қаласындағы әйелдер істері және отбасы демографиялық кеңесінің төрайымы Зәуреш Исабаева көпбалалы аналарға өзінің жылы лебізін білдіріп өтті.
— Құрметті аналар, әжелер! Бүгін біз шуақты көктемнің шырайлы мерекесінде көп балалы аналардың басын қосып отырмыз. Қазақ халқы «Ең сұлу әйел – өмірге көп бала әкелген әйел» деген. Бүгін осы залда ең сұлу, ең үлкен құрметке ла-йықты әз аналар отыр. Көп балаға әлемнің жарығын сыйлау – батырлық, үлкен бақыт. Бақыттың бал дәмін татқан аналар, сіздердің әрқайсыңызды дана деп, дара деп білеміз. Сіздерді қала әкімі Айбек Кәрімовтің, Семей қаласындағы әйелдер істері және отбасы демографиялық комиссиясының мүшелері атынан мерекелеріңізбен құттықтауға рұқсат етіңіздер!- деп құттықтай келе, — «Балам» деп, түн ұйқыларыңызды төрт бөліп, тәй-тәй басқан алғашқы қадамынан бастап, бүгінгі күнге дейін әрқайсыңыз балаларыңызды «қанаттыға қақтырмай, тұмсықтыға шоқыттырмай» аялап өсіріп, сол балалардың қызығын көріп отырсыздар. Сіздерге ұзақ ғұмыр, отбасыларыңызға баянды бақыт тілейміз,- деп сөзін қорытындылады.
{jcomments on}Семей шаһарында бүгінгі күнге дейін Елбасының Жарлығымен екі жарым мыңнан аса аналар «Алтын алқа», «Күміс алқа» иегерлері атанған екен. Жақында ғана тұсау-кесері өтіп, көпшіліктің көңілінен шыққан қойылымға батыр аналар да көп жиналды. Тіпті, 10-12 балаға әлемнің жарығын сыйлаған аналармен бірге өмірлік қосақтары асқар таудай әкелер де келді. Қойылымның батыр аналардың жүрегіне жол тапқанын қол соғып, қошемет көрсетіп отырғандарынан да аңғару қиын емес. Себебі, мұнда шынайы өмір көрінісі бейнеленген. Қойылымның негізгі мақсаты — балалары ер жетіп, ұлдарын ұяға, қыздарын қияға қондырған шаңырақтағы қос қарияның тұрымысы баяндалады. Өмірдің ағысымен ұл – қыздары қалаға кеткендегі екі қарттың оқиғасы бейнеленген қойылым сәтті шыққан туынды деуге де әбден лайық. Ата-ананы құрметтеу, бала күніңде мейірім сыйлай білген аяулы жандардың қартай-ған шағында оларға дәл сондай мейіріммен қарап, жанынан табылу да көрерменге ой салды. Көрермендерді күлдіре отырып жылатқан, жылата отырып жұбатқан әртістер шығарманы шеберлікпен ойнап, көпшілікке ой тастағандай. Халыққа рухани азық сыйлап, мәдениеттілікке тәрбиелейтін театр десек, аналарды театрда құттықтау барша нәзік жандыларға ерекше сый болған сыңайлы. «Студент кезімізде жиі театрға барушы едік. Бұл өнерді тамашалаудан қол үзгенімізге біршама уақыт болыпты. Бұл қойылым жастық шағым қайтып оралғандай әсер қалдырды» дейді қатар отырған аналардың бірі екіншісіне сыбырлай тіл қатып.
Қала іргесіндегі Мұқыр ауылынан келген сегіз баланың анасы Бақтыгүл Ахметова болса,
ауыл әкімі құрметтеп шақырғандықтан, қойы- лымға келіп отырғандығын атап өтті.
-Өнердің ордасы театрға шақыру біз үшін үлкен қуаныш. Барлық аналарды мерекелерімен құттықтаймын. Отбасыларына бақыт тілеймін. Жас қыздарға ана болу бақыты бұйырсын. Жас аналар өмірге көп ұрпақ әкеліп, құрметке бөленсін. Балаларымыз аман, ел іргесі тыныш болсын. Барша аналардың басын қосып, театрға шақырып отырған қала әкіміне алғысымды айтамын,- деп Бақытгүл апай қала әкімі Айбек Кәрімовтің атына жүрекжарды ыстық ықыласын білдірді.
Шаттанған сәбидің күлкісі мен ананың бал-бұл жанған жүзінен асқан бақыт жоқ сияқты көрінді. Себебі ана — ғаламшардың кіндігі, тартылыс күші іспетті. Әр адам үшін ардақты жан да – ана. Ана — әлемге тіршілік нәрін себуші, әлемнің сұлулығы.
Әйгерім СӘРСЕНҒАЛИ,
«Семей таңы»
