Облыс әкімі Даниал Ахметовтің өкімімен Үржар ауданының әкімі лауазымына осы уақытқа дейін Алтай өңіріне басшылық жасаған Нұржан Тілеужанұлы Тоқсейітов тағайындалды.
НҰРЖАН ТІЛЕУЖАНҰЛЫ ТОҚСЕЙІТОВ
1960 жылы 6 шілдеде Семей облысы Бесқарағай ауданы Өндіріс ауылында дүниеге келген. Еңбек жолын 1977 жылы Бесқарағай ауданындағы «Семеновка» совхозында бастаған. Семей зоотехникалық – малдәрігерлік институтының түлегі. Ғылым кандидаты. Әр жылдары Зырян ауданы әкімінің орынбасары, Облыстық ветеринария басқармасының басшысы, 2015 – 2017 жылдар аралығында Бесқарағай, 2017 жылдың наурызынан бастап Зырян, бүгінгі Алтай аудандарын табысты басқарды. Нұржан Тілеужанұлының мемлекеттік басқару қызметіндегі тәжірибесі мол.
Көпшілік Нұржан Тоқсейітовті мемлекеттік тілдің жанашыры деп біледі. Ол басшылық жасаған жылдары бұрынғы Зырян ауданы мен осы аттас қала атауы Алтай болып өзгерді. Нұржан Тілеужанұлы Алтай өңірінде әкім қызметін атқара жүріп ономастика саласында көптеген өзгерістерге бастамашы болды. Аудан экономикасы жақсы көрсеткіштерге қол жеткізді. Ұлтаралық қатынас өзекті тақырып болып тұрған сәтте көп ұлтты өңірді басқару оңай емес екендігі белгілі. Нұржан Тоқсейітов бұл орайда мүлт кетпеді. Бесқарағайды да, Алтайды да ұлтаралық қатынаста тепе-теңдікті сақтай отырып басқарды. Халықтың құрметіне бөленді.
Облыс басшысы Нұржан Тілеужанұлына аймағымыздағы ең үлкен, жауапкершілік жүгі ауыр өңірді сеніп тапсырып отыр. Үржар ауданының әлеуметтік-экономикалық әлеуеті жоғары. Аудан активіне Нұржан Тоқсейітовті таныстыра отырып, облыс әкімі алдағы бес жылда іске асады деп жоспарланған нақты бағдарламаларды да айтып өтті. Жаңа тағайындалған әкімге әсіресе аграрлық секторды дамыту жұмысын күшейтуді тапсырды.
Көпшілік Нұржан Тілеужанұлын еңбекқор да сауатты басшы ретінде таниды.
Ендеше, біз де Нұржан Тілеужанұлын құттықтай отырып, Үржар өңіріндегі жаңа қызметіне табыс тілейміз.
«Семей таңы» газетінің ұжымы{jcomments off}
