Бүгінгі таңда облыс әкімі Даниал Ахметовтің айрықша назарға алуымен аймағымыздағы Аягөз ауданында да халық денсаулығын жақсарту бағытында ілкімді шаралар қолға алынып жатыр. Өңір медицинасын дамытуда бірқатар жоспарлы жұмыстар сәтімен жүзеге асырылуда. Соның ішінде медициналық орталықтар ашу, аудан көлеміндегі емдеу орындарын жаңғырту мен медициналық қызметті жаңашыл бағытта жүзеге асыру ісі кеңінен жолға қойылған. Алайда, аталмыш шаралардың нәтижесінде ауданда медицина саласы мамандарының қажеттілігі артуына байланысты, дәрігерлердің жетіспеушілігі мәселесі туындап отыр. Осы орайда Семей медицина университетінде білім алып жатқан осы өңірдің түлектерін ауданға тарту қажет. Бұл жайында кеше, апта бейсенбісінде қаламыздағы медицина университетінде оқитын Аягөз ауданының студент жастарымен өткен кездесу барысында аудан әкімі Ділдабек Оразбаев кеңінен айтып өтті.
Студенттермен кездесуге аудандық орталық аурухана басшылығы, аудандық білім бөлімі, жұмыспен қамту және әлеуметтік бағдарламалар бөлімі мен жұмыспен қамту орталығы, Жастар ресурстық орталығының белсенділері және өзге де бөлімдер мен мекемелер басшылары келген болатын.
Кездесу басталмас бұрын Семей қаласында оқитын аягөздік болашақ жас мамандар үшін еңбек жәрмеңкесі ұйымдастырылды. Бұл шараға ертеңгі күннен үміт күткен жастар көп жиналды. Тек медициналық университет интерндері ғана емес, қаладағы барлық жоғары және арнаулы білім беретін оқу орындарын бітіруші түлектер де келіпті.
Бүгінде Аягөз ауданында көптеген мамандықтарға сұраныс бар. Соның ішінде, дәрігерлер және педагогтермен қатар, инженерлік сала, IT маманы, ветеринариялық қызмет саласы мамандықтарына деген қажеттілік жоғары екен. Еңбек жәрмеңкесі барысында болшақ мамандар жұмыс орнын ұсынушылармен ашық әңгімелесіп, бірқатар сұрақтарын да қойды. Атап айтсақ, ауылдық елді мекенге барып жұмыс істегісі келетін жастардың сауалдары көбінесе жалақы мен баспана мәселесіне қатысты болды.
Ал оқу орнының залында болып өткен кездесу жиынында сөз алған аудан басшысы Ділдабек Тәжібайұлы ең алдымен аудан көлеміндегі медицина саласы бойынша атқарылып жатқан жұмыстар қатарына тоқталды. Аймақ басшысы Даниал Ахметовтің бастамасымен қолға алынған жаңа нысандар туралы да айтып өтті. Мәселен, Аягөз қаласында ашылған инсульт орталығында бүгінгі күнге дейін 650-ден астам адам ем алған. Келешекте орталықтың қызмет аясын кеңейте түсу көзделуде. Сондай-ақ облыс әкімі Даниал Кенжетайұлының бастамасымен алдағы уақыттарда Аягөзде жүрек-қан тамыр ауруларын емдеу және диагностика орталығы да ашылатын болады. Бүгінгі таңда бұл жобаның жалпы құны 658 млн теңгені құрайды.
Аудан басшысы тоқталып өткендей, алдағы уақытта ауданаралық травматология және ортопедиялық орталық ашу да жоспарда бар. Осы және өзге де өзекті тақырыптарды қозғаған Аягөз ауданының әкімі Ділдабек Тәжібайұлы жастармен кездесуінің мақсаты Семей қаласының оқу орындарында әртүрлі салада білім алып жатқан студенттерге өңірде қандай мамандықтарға қажеттілік барын жеткізіп, туған өлкесін көркейтуге атсалысуға, кіндік қаны тамған жерге қызмет етуге шақыру екенін де айтты. Сондай-ақ аудан басшысы биылғы жылға «Дипломмен — ауылға» бағдарламасы бойынша 30 маманға үй алуға жеңілдетілген несие беруге және көтермеақы төлеуге республикалық бюджеттен 100 миллион теңгеге жуық қаражат бөлінгенін де айтып өтті.
Жалпы, қазіргі күндері Аягөз ауданы бойынша бірқатар мамандарға тапшылық бар. Атап айтсақ дәрігерлер мен педагогтерге деген қажеттілік жоғары болып тұр.
— Бүгінгі күні ауданымызға 7-8 дәрігер мен 43 мұғалім керек. Соның ішінде физика, орыс тілі, математика пәнінің ұстаздарына сұраныс көп. Елбасының тапсырмасы бойынша, Аягөз ауданында үш тілде білім беру мәселесі жолға қойылуда. Сондықтан жаңаша білім беруге маманданған мұғалімдерді ауданымызға шақырамыз. Бір бұл емес, өңірімізге ауыл шаруашылығы мамандары, атап айтсақ мал дәрігерлері, зоотехниктер, агрономдар керек. Ауыл шаруашылығы саласын өркендетуде білікті мамандарға сұраныс артып отыр, — деп атап өткен аудан әкімі Ділдабек Тәжібайұлы аталмыш саланы дамытуда ғылыми бағытта жұмыстар жүргізілетінін де жеткізді.
Осы орайда айта кетсек, Аягөз ауданының әлеуетін арттырып отырған сала — ауыл шаруашылығы. Мемлекеттік бағдарламалар игілігін тиімді пайдаланудың нәтижесінде бұл бағытта ауқымды жұмыстар жүргізуге мүмкіндіктер пайда болды. Соның нәтижесінде Аягөз ауданы облысымыздағы 19 аудан-қала арасында бірінші орынға шықты. Бұл жайында өңірдің әлеуметтік-экономикалық дамуына шолу жасап өткен Ділдабек Тәжібайұлы қазіргі таңда аудан бойынша ауылдық елді мекендерде немесе Аягөз қаласының өзінде тұрып, жұмыс істеп қана қоймай, мал өсіріп, отбасының әл-ауқатын арттыруға да мол мүмкіндік бар екенін айтты. Яғни «Дипломмен — ауылға» бағдарламасы аясында келген маман үшін төмен пайызды несиемен мал сатып алып, бордақыға байлап, жеке шаруашылығымен айналысуға да жан-жақты жағдай бар.
Бүгінде Аягөз өңірінде жастарды ауылдық жерлерге тарту мақсатында бірқатар тиімді шаралар жүзеге асырылып жатыр. Атап айтсақ, ауылдық елді мекендердегі клуб үйлерін жаңалау, жастардың өз уақыттарын тиімді өткізулері үшін саябақтар мен мәдениет үйлерінің жұмыстарын жандандыру бағытында біршама жұмыстар атқарылуда. Осы шаралар жайлы айтып өткен Аягөз ауданының әкімі жиналған жастар қауымын еш алаңдамастан Аягөз өңіріне, өңірдегі ауылдарға «Дипломмен — ауылға» бағдарламасы бойынша келіп, еңбек етуге, туған өлкені көркейтуге атсалысуға шақырды.
Сонымен қатар осынау кездесу барысында бүгінде Семей қаласында тұратын, заманында Аягөз ауданында еңбек етіп, өңірді гүлдендіруге, әлеуметтік-экономикалық ахуалын көтеруге үлес қосқан аға буын ардагерлермен де кездесті.
Сондай-ақ аталған шара барысында аудан басшысының бастамасымен Семейдегі оқу орындарында түрлі мамандықтар бойынша білім алып жатқан Аягөз өңірінен шыққан 10 студент жасқа аудан әкімінің атынан алғыс хат пен сыйлыққа ноутбуктер тарту етілді.
Ал жиынның соңында студенттерге кезек беріліп, сауалдары тыңдалды. Аудан әкіміне сұрақ қою мүмкіндігін алған аягөздік студенттер бір реттік көтермеақы, тұрғын үймен қамту, ауылдық жерлердегі жастарға жасалып жатқан жағдай, Шұбартау өңіріндегі мәдениет саласының даму қарқыны жайлы, тағы басқа да сауалдарын қойып, тұшымды жауаптар алды.
Айта кетсек, студент жастармен кездесу жиындары дәстүрлі түрде жыл сайын өткізіліп келеді.
Қуаныш ЖОЛЫМБЕТ, «Семей таңы»{jcomments off}
