2 наурыз күні ШҚО Дін мәселелерін зерттеу орталығы Семей өңірлік секторы мен Семей қаласының ішкі саясат бөлімінің ұйымдастыруымен ОВ-156/15 түзету мекемесінде 1 наурыз Алғыс айту күніне арналған «Ризашылық, рақымшылық» атты концерт өтті. Шараға ШҚО дін істері басқармасының діни бірлестіктермен байланыстар және мемлекеттік қызметтер көрсету жөніндегі бөлім басшысы Айтқұрман Тұрғанбаев, «Жанұя орталығы» қоғамдық қорының президенті Жанна Жыбраева, Семей қалалық орталық мешітінің наиб имамы Бауыржан Таубекұлы, Воскресенский собор катехизаторы Виталий Явкин және Қалалық Мәдениет Сарайының әншілері қатысты.
Шара барысында ШҚО дін істері басқармасының діни бірлестіктермен байланыстар және мемлекеттік қызметтер көрсету жөніндегі бөлім басшысы Айтқұрман Тұрғанбаев алғыс айту күнімен құттықтап, түзету мекемесіндегі азаматтардың тезірек орталарына оралуларына тілектестігін білдірді.
«Жанұя орталығы» қоғамдық қорының президенті Жанна Жыбраева да өз лебізін білдірді.
— Өмірде кез-келген адам қателеседі. Бірақ бәрін қайта бастауға ешқашан кеш емес. Сіздерді үйде отбасыларыңыз, жақындарыңыз күтіп отыр. Үміттеріңіз үзілмесін. Тезірек орталарыңызға оралыңыздар. Осы орайда «Жанұя орталығы» қоғамдық қорының халыққа тегін қызмет көрсететінін де айта кеткім келіп тұр. Біздің орталықтан психологиялық, құқықтық тегін кеңес алуға болады. Балаларға арналған ағылшын курстары да бар, — деді Жанна Жыбраева.
Кеш барысында Қалалық мәдениет сарайы әншілері өнер көрсетті. Түзету мекемесінде жазасын өтеушілер арасында ұйымдастырылған суреттер мен өлеңдер байқауының қорытындысы шығарылып, алғыс хаттармен, сыйлықтармен марапатталды.
Айтолқын Саматова, «Семей таңы»{jcomments off}
