Дүйсенбі күні қалалық әкімдіктің үлкен залында қала басшысы Айбек Кәрімовтің жетекшілік етуімен мемлекеттік қызметкерлердің кезекті аппараттық сабағы өтті. Аппарат сабағында Қазақстан Республикасы Президентінің жанындағы мемлекеттік басқару академиясының «Экономиканы басқару» кафедрасы меңгерушісінің міндетін атқарушы, экономика ғылымдарының кандидаты Ерлан Әбіл «Макроэкономика: манитарлық саясат» тақырыбында дәріс оқыды. Дәріс барысында экономика саласына жан-жақты шолу жасаған Ерлан Қуанышұлы макроэкономикалық жағынан 2014 жыл Қазақстан үшін жақсы басталғанын айтты.
– Жақында ғана болған девальвация еліміздің экономика саласының дамуына елеулі серпін берді десе де болады. Өйткені, девальвацияның зияны тек ірі қаржы қорлары бар елдерге көбірек әсерін тигізеді. Әрине, девальвацияны ешкімнің ұнатпасы анық. Алайда, бұл құбылыстың Қазақстан сияқты дамушы елдерге аса қатты зияны бола қоюы екіталай, – дей келе, елдегі девальвацияның болу себебін де түсіндіріп өтті.
{jcomments on}Оның айтуынша, қаржылық құбылысқа АҚШ экономикасы дамуының әсерімен тікелей байланысты. Сонымен қатар, тәуелсіздік алған жылдардан бері елімізде үш рет дағдарыс және үш рет девальвацияның орын алғанын атап өткен Ерлан Әбіл инфляция мәселесін де сөз етті. Бүгінгі күні өз қызметін атқарып тұрған Кедендік Одақ жайлы да өз ойын білдірген Ерлан Қуанышұлы Ресей Федерациясы экономика бағытында да еліміздің ең сенімді серіктесі екенін жеткізді. Мысалы, Қазақстанда өндірілген тауарлардың Еуропаға және өзге де елдерге Ресей арқылы экспортталатындығын, сол сияқты импортталып келетін тауарлар да осы көрші мемлекет арқылы елге жеткізілетіндігін тілге тиек етті.
– Экономиканың өсуі адамдарға, олардың мінез-құлықтарына және ділі мен әдеп-ғұрпына да байланысты. Мысалы, салт-дәстүрін мықтап ұстанатын Жапония мен Кореяның, содан кейін темірдей тәртіп орнаған, заңдары қатал Германия мемлекеті экономикасының қалай дамығанын білесіздер. Экономика саласында адамдардың мәдениеті мен жүріс-тұрысына дейін бәрі ескеріледі. Сондықтан, саясат пен экономика және мәдениет салалары бір-бірімен тығыз байланысты, – деген Е.Әбіл бизнестің дамуына да кеңінен тоқталып өтті. – Жалпы, адам баласы қандай іспен айналыспасын, мысалы, музыка маманы болуды көздейтін адам туралы айтар болсақ, оның бойында аз да болсын таланты болады немесе өзінің қызығушылығына байланысты арнаулы оқу орынында білімін шыңдайды. Егер таланты да, арнайы білімі де болмаған жағдайда «талаптыға нұр жауар» дегендей мықты ортада жүрсе де, талабының арқасында жетістікке қол жеткізеді. Міне, бизнеспен айналысу үшін де адамға талант немесе білім не орта қажет.
Ерлан Қуанышұлына мемлекеттік қызметкерлер экономика саласына қатысты көкейдегі сауалдарын жолдап, тиісті жауаптарын да алды. Сөз соңында Қазақстан Республикасы Президентінің жанындағы мемлекеттік басқару академиясының бағдарламасы туралы да айтып, аталмыш академияның докторантура, магистратура бойынша мемлекеттік қызметкерлерді дайындайтындығын жеткізді.
Қала әкімі Айбек Кәрімов экономикалық жан-жақты шолу жасап, осы салаға қатысты сұрақтарға кеңінен жауап бергені үшін барша мемлекеттік қызметкерлердің атынан Ерлан Қуанышұлына ризашылығын білдіріп, жұмысына табыс тіледі. Алдағы уақытта да академиямен тығыз байланыста болуға ниетті екендігін айтты. Жиын соңында бірқатар мемлекеттік қызметкерлер маманға жеке сұрақтары бойынша да кеңес алуға мүмкіндік алды.
Нұрдәулет КӘКІШЕВ,
«Семей таңы»
