Апта дүйсенбісінде Семей қалалық «Nur Otan» партиясы филиалында Саяси кеңестің кезекті отырысы болып өтті. Бұл жолғы басқосуға Семей қаласының әкімі Ермак Сәлімов, қала әкімінің орынбасары Айдар Садырбаев, қалалық ішкі саясат бөлімінің басшысы Нұржан Есенжолов, Семей қалалық Достық үйінің директоры Надежда Шарова, Саяси кеңес мүшелері, Қазақстан халқы Ассамблеясының шаһарымыздағы өкілдері мен бастауыш партия ұйымдарының төрағалары және жергілікті БАҚ өкілдері қатысты.
Жиынды кіріспе сөзбен ашқан Семей қаласының әкімі, қалалық филиалдың төрағасы Ермак Бидахметұлы күн тәртібінде «Ұлттық бірлік — «Nur Otan» партиясының стратегиялық таңдауы» басты тақырып ретінде алынып отырғанын жеткізіп, аталмыш мәселе төңірегінде сөз қозғады.
Алдымен аталған тақырып бойынша Қалалық Достық үйінің директоры Надежда Васильевна баяндама жасады.
— Президентіміз айтып өткендей, бүгінгі таңда еліміздегі барлық этностар бір ұлт тәрізді тұтастықта, тұрақтылықта өмір сүруде. Ал қазақ халқы шын мәніндегі мемлекет құраушы ұлтқа айналды. Мұның маңызы терең. Ең алдымен, бұл – мемлекетіміздің болашағы үшін ерекше жауапкершілік, қасиетті борыш. Қазақстан халқы Ассамблеясының мүшелері осы бағытта жұмыс жүргізіп, елдегі береке-бірлікті нығайтып, жастарымызға дұрыс жол көрсетіп, тәрбие беруі керек. Бұл ретте Қордайдағы оқиға сабақ болуы тиіс, — деп атап өткен Достық үйінің директоры кез келген келеңсіздікті қылмыстық топтар өз мүдделеріне пайдаланып кетуі мүмкін екендігін жеткізді. Яғни, ұлттық бірлікті сақтауда партия мүшелері бас болып, қоғам болып жұмыла жұмыс жүргізу қажет.
Жиында сонымен қатар «Nur Otan» партиясы филиалы төрағасының бірінші орынбасары Айнұр Арғынбекова да баяндама жасады. Партияның қоғамдық қабылдау бөлімінің жұмысынан бастап Елбасының еліміздегі ұлттар бірлігі саясаты жөнінде де сөз қозғаған Айнұр Серікпайқызы аталмыш бағытта партия филиалы тарапынан атқарылып жатқан жұмыстармен кең көлемде таныстырды.
Басқосуда қазіргі таңдағы қоғам үшін өзекті саналатын бірқатар мәселелер, атап айтсақ қала ішінің тазалығы, атаулы әлеуметтік көмек тағайындау, қазақ тілін үйрену сынды мәселелер де кеңінен талқыланды.
Сондай-ақ отырыс барысында іс-шараға қатысушы бірқатар партия мүшелеріне қала көлемінде өткізілетін түрлі қайырымдылық акцияларында, семинарларда белсенділік танытқандары үшін арнайы сертификаттар, алғыс хаттар табыс етіліп, салтанатты түрде марапатталды.
Әлібек КЕМЕЛХАН, «Семей таңы»{jcomments off}
