Шығыс Қазақстан облысында тұрақты эпи-демиологиялық жағдайды сақтау үшін барлық бұқаралық іс-шаралар тоқтатылды. Ол туралы ШҚО әкімі Даниал Ахметовтың үндеуінде айтылған.
«Бүгін арнайы жиналыс өткізіп, коронавирустың алдын алу шараларын күшейту бойынша бірқатар нақты тапсырма бердім. 3 наурыздан бастап Шығыс Қазақстан аумағында көпшіліктің қатысуымен өтетін бұқаралық іс-шаралар тоқтатылады.
Қазіргі уақытта облыстың медициналық мекемелері қажетті құрал-жабдықтармен, дәрі-дәрмектермен толық қамтамасыз етілген. Бұған қоса ауруханаларда арнайы оқу-жаттығулар өтуде. Сондықтан бұл сақтық шараларына түсіністікпен қарап, қорықпауға шақырамын», — деді облыс тұрғындарына үндеу жасаған облыс әкімі Даниал Ахметов.
Осылайша, Шығыс Қазақстан облысының әкімдігі әлемде коронавирустың таралуына байланысты тұрақты эпидемиологиялық жағдайды сақтау үшін көп адам шоғырланатын шараларды шегеруді ұсынды.
«Облыс әкімі аппараты басшысының қолы қойылған ұсынымхат барлық мекемелер мен кәсіпорындарға жіберілген», — дейді облыс әкімінің баспасөз хатшысы Айгүл Базарова.
Осыған орай ШҚО Драма театрында 9 наурызға дейін жоспарланған қойылымдар өтпейтін болды. Бұл жайлы мәдениет ордасының ресми сайтында жарияланған.
«Эпидемиологиялық жағдайды сақтау мақсатын-да 4-9 наурыз күндері аралығына жоспарланған қойылымдар кейінге шегерілгенін хабарлаймыз. Келтірілген ыңғайсыздықтар үшін кешірім сұраймыз. Билеттерді театр кассасына өткізулеріңізге болады, — деп хабарлады театр әкімшілігі.
Сондай-ақ ШҚО Өнер музейіндегі және А.Пушкин атындағы облыстық кітапханадағы шаралар кейінге қалдырылған.
Облысымыз бойынша алдын ала жоспарланған көптеген мәдени-спорттық сипаттағы шаралар да белгісіз мерзімге дейін шегерілді.{jcomments off}
Өз тілшіміз
