Елімізде орын алған төтенше жағдайға байланысты қаламыздағы қоғамдық орындарындағы сақтық шаралары күшейтілгені белгілі. Мемлекеттік санитарлық-эпидемиологиялық бақылау қызметі бірінші кезекте автовокзалдар мен темір жол вокзалдарында тексеру жүргізуде.
Нақтырақ айтар болсақ, ШҚО тауарлар мен қызметтердің сапасы мен қауіпсіздігін бақылау департаментінің баспасөз қызметі хабарлағандай, өткен апта ішінде облысқа келген 10416 жолаушыдан анкета алынған. 185 көлік құралы тексерілген.
— Карантинге жабылғанға дейін Нұр-Сұлтан қаласынан қайтып келген 3942, Алматыдан оралған 5117 жолаушы анкета толтырды. Сонымен қатар Қазақстанның Ресей Федерациясымен шекарасындағы бес автокөлік бекетінде және Қытай елімен шекарасындағы екі бекетте санитарлық-карантиндік бақылау күшейтілді, — деп хабарлады департаменттің баспасөз қызметі.
Еліміздің Ресей Федерациясымен шекарасындағы барлық кеден бекеттеріндегі санитарлық-карантиндік бақылау қатаңдатылды. Қазіргі күні Семей қаласы арқылы өтетін транзиттік Ташкент — Новосібір, Алматы — Новосібір және Бішкек-Новосібір бағыттары бойынша жолаушылар қатынасы уақытша тоқтатылған. Сондықтан да аймақтардағы темір жол бекеттері мен барлық автобекеттерде жолаушылар саны азайған.
— Қазіргі күні барлық вокзалдарда санитарлық-эпидемиологиялық бақылау шаралары күшейтілді. Вокзал қызметкерлері көп реттік пайдалануға жарамды медициналық бетперделермен, арнайы қолғаптармен толықтай қамтамасыз етілген. Залалсыздандыру жұмыстарына қажетті антисептикалық құралдар да жеткілікті. Елімізде жарияланған төтенше жағдайға байланысты жолаушылар саны азайғандықтан қауырт жұмыс жоқ. Ал осы жағдай вокзал қызметкерлеріне Абайдың 175 жылдық мерейтойына даярлық шараларын толыққанды жүргізе беруге мүмкіндік туғызып отыр, — дейді Семей темір жол вокзалының басшысы Ержан Құрманалыұлы.
Айта кетер тағы бір жайт, қазақстандықтарға шетелге шығуға уақытша тыйым салынды. Сондай-ақ көршілес Қытай мемлекетіне қатынайтын жолаушылар автобустары әзірше тоқтатылды. Бұл туралы облыстық Туризм және сыртқы байланыстар басқармасының басшысы Марат Кабаков жуырда аймақтық коммуникациялар қызметінде болып өткен баспасөз мәслихатында мәлім етті.
— Турфирмалар ұсынған дерек көздеріне сүйенсек, бүгінде шығысқазақстандық 72 азамат БАӘ, Тайланд, Египет, Вьетнам, Гоа, АҚШ және РФ елдерінде жүр, — деді Марат Кабаков.
Брифинг барысында басқарма басшысы облыстағы барлық қонақ үйлер мен демалыс базаларында, хостельдер мен турбазаларда санитарлық-дезинфекциялық жұмыстар жүргізіліп жатқанын атап өтті.
— Туристік саланы дамытуға ден қойған кәсіпкерлердің несие төлеу мерзімі кейінге шегерілді, — деді өз сөзінде басқарма басшысы Марат Кабаков.
Мамандардың айтуынша, сақтық ережелеріне сәйкес, шетелден оралатын жерлестеріміз қатаң тексеруден өткізіліп, карантинге жатқызылады. Айта кетерлігі, қаламыз бойынша қазіргі күні коронавирус инфекциясын жұқтырған екі азаматпен байланыста болған 5 адам бар. Олардың барлығы үй жағдайында карантинге алынып, дәрігерлердің жіті бақылауында.
Өз тілшіміз{jcomments off}
