Семей қаласы бойынша еліміздегі төтенше жағдайға байланысты коронавирустық инфекцияның таралуының алдын алу мақсатында бірқатар іс-шаралар қолға алынды. Осы орайда облыс әкімі Даниал Ахметовтің тікелей тапсырмасымен Семейде тігілген бірнеше мәрте қолданылатын бетперделер соғыс және еңбек ардагерлеріне, мүгедектер мен атаулы әлеуметтік көмек алатын көп балалы отбасыларға тегін таратылуда.
Семейлік еріктілер өзара бірнеше топтарға бөлініп, бетперделерді жекелеген тұрғындарға жеткізуді бастап кетті.
Жалпы, бүгінгі таңда өзімізде дайындалған бетперделер Семейдің 13090 тұрғынына, соның ішінде 213 жетім балаға, 9972 бірінші, екінші және үшінші топтағы мүгедектерге, 2635 тыл еңбеккерлері мен соғыс ардагерлеріне және оларға теңестірілген 270 адамға берілмек.
— Елімізде коронавирус пандемиясына байланысты төтенше жағдай жарияланғаны белгілі. Осы орайда Семей қаласының Жастар ресурстық орталығының қызметкерлері мен белсенділері өзара бірігіп, игілікті шараны қолға алдық. Қазіргі күндері Семей қаласы бойынша 1400-ден астам мүмкіндігі шектеулі адам тіркелген екен. Біздің еріктілер осындай мүмкіндігі шектеулі азаматтар мен жалғыз басты қарттардың үйлеріне барып, оларға санитарлық бетперделер мен коронавирустан сақтану шаралары жазылған облыстық басылымның арнайы шығарылымын таратты, — дейді Семей қаласының Жастар ресурстық орталығының заңгері Асхат Асқаров.
Достық үйінің еріктілері де Семей қаласының тұрғындарына бірнеше мәрте пайдалануға болатын маскаларды тегін таратыпты. Айта кетсек, Семей медицина университетінің ректоры Ерсін Жүнісов қалалық Достық үйінің этномәдени орталықтарына көмек ретінде 500 бетперде берген екен.
Аталмыш оқу орнының жанындағы тігіншілер цехы бірнеше рет пайдалануға болатын маскалар тігіп, ең алдымен өз қызметкерлерін, университет госпиталіндегі кіші медицина мамандарын және дәрігерлерді маскалармен қамтамасыз етіпті. Университет басшылығы сонымен қатар қалалықтарға да көмектесу жағын қарастырып отыр.
Осы орайда ҚХА еріктерлері Антонина Клиновицкая, Ядвига Радионова, Ольга Ушакова, Мария Горбачевалар да инфекцияның алдын алу шараларына атсалысып, тұрғындарға вирустан сақтану жолдарын түсіндіріп, бетперделер таратыпты.
Елбасымыз Нұрсұлтан Назар-баевтың Үндеуіне орай, облыс әкімі Даниал Ахметовтің бастамасымен өңіріміздің 470 мыңнан астам азаматы бірнеше мәрте қолдануға болатын маскалармен тегін қамтамасыз етілмек.
Бүгінде бетперделер жергілікті дәріханаларда 170 теңгеден сатылуда. Ал зейнеткерлер мен көп балалы аналар «Қазпошта» бөлімшелерінен тегін ала алады.
Әлібек КЕМЕЛХАН, «Семей таңы»{jcomments off}
