ЖАСТАРҒА СЕНІМ АРТТЫ
Қазақстан Республикасының Тұңғыш Президенті — Елбасы Н.Ә.Назарбаев тәуелсіздік алған алғашқы жылдардан бастап бүгінге дейінгі күрделі кезеңде де отандастарымызды ортақ мүддеге жұмылдырған Ұлт Көшбасшысы деп білемін.
Күні кеше жарыққа шыққан «Бірлесе білген ел бәрін жеңеді» атты мақаласы жоғарыда айтылған сөзімнің дәлелі болса керек. Еліміздің ұлтжанды азаматы және тәуелсіздіктің құрдасы ретінде аталған мақаладан түйген ойымды өздеріңізбен бөлісуді жөн санадым.
Иә, Елбасы мақаласында айтылған 90-жылдардың басында болған қиындықтарды көзіміз көрмесе де, кейіннен естіп, оқып білдік. Бүгін тәуелсіз Қазақстанның алтын ғасырында өмір сүріп жатқан жастарды бақытты ұрпақ деп санаймын. Осы күнімізді кешегі күрделі кезеңдермен салыстыруға мүлде келмейді.
Осы орайда Елбасымыздың тәуелсіздіктің құрдастары — жастарға арнап айтқан сөзіне тоқталғым келеді. «Еліміздегі ең қуатты күш – өздеріңсіңдер. Аға ұрпақ сендер үшін қолдан келгеннің бәрін жасады, енді сендердің де күш-қайрат жұмсайтын кездерің келді. Жамандықтан, жат әдеттен сақтанып, игі істер жасауға ұмтылыңдар. Үлкенге – ізетті, кішіге – қамқор, бір-біріңе дос болыңдар»,- деді Елбасы.
Тәуелсіз Қазақстанның жаңа белесін қалыптастыруда біздің иығымыздағы жауапкершілік жүгі ауыр екенін барша замандастарыма, құрдастарыма жеткізгім келеді.
Елбасы айтқандай, рухы мықты, өзіне сенімді адамды қиындықтар шынықтырады. Сондықтан біз бойкүйездіктен, сарыуайымнан, енжарлықтан арылып, тығырықтан шығудың жолын іздеген бүкіл әлем халқымен бірге ширыға, шыңдала түсуіміз керек. Салауатты өмір салтын ұстанып, елге қызмет ету мен білім алуда қатарымыздың алды болуымыз қажет.
Тұңғыш Президентіміз мемлекет тарапынан барлық қолдау көрсетіліп жатқанын айтып, зиялы қауым өкілдері мен кәсіпкерлерге, жастарға үлкен сенім білдіріп отыр.
Қадірлі достар! Осындай қиын кезеңде береке-бірлігімізді, татулығымызды көрсетіп, бірге болайық. Қиындықты бірге еңсерейік!
Елбасымыз айтқандай, Абай атамыздың өсиетін ойымыздан шығармай, жастық жігерімізді, ақыл ойымызды, еліміздің ертеңі үшін пайдалануға шақырамын.
Олжас СОҒЫМБАЙ,
Семей қаласының Жастар ресурстық орталығының директоры
ПАРАСАТ БИІГІНЕН
Қазақстан Республикасының Тұңғыш Президенті – Елбасы Нұрсұлтан Назарбаевтың «Бірлесе білген ел бәрін жеңеді» атты мақаласы адамзат баласы көзге көрінбейтін тұтқиылдан келген жаман індет – коронавирус дертінен абдырап қалған кезінде жарық көруі елдің еңсесін бір көтеріп тастады.
Елбасының мақаласы менің санама бірден атақты жырау Жамбыл бабамыздың «Ленинградтық өрендерім» атты өлеңінің жарық көруін есіме түсірді. Жүзге келген қарт жырау қырандай дүр сілкініп, тұтқиылдан шабуыл жасаған фашистік машинаға қарсы қолына қалам алып, халқын жігерлендірген еді.
Елбасы Нұрсұлтан Назарбаев та атақты жырау бабасы сияқты қиын сәтте халқын жігерлендіріп, жасымауға шақырды. Тәуелсіз Қазақ елін әлем таныды, бірлік болса, біз жеңбейтін қиындық жоқ деген ой мақаланың тұтас болмысында көрініс тапқан.
Елбасы биік парасатпен хакім Абайдың, даңқты қолбасшы Бауыржан Момышұлының, Әйтеке би бабамыздың, әйгілі данышпан Төле бидің даналық сөздерін келтіре отырып, халқың осындай қиын кезде сабырлық сақтап, бірлікте болуға шақырады.
Терең мазмұнда жазылған мақаладан халқына, оның ішінде жастарға қаратып айтқан сөздерін келтіріп өткенді ретті санаймын: «Жас өскін – жас ұрпаққа айтарым: тәуелсіздік жылдары дүниеге келген сендер келер жылы орда бұзар отызға толасыңдар. Еліміздегі ең қуатты күш – өздеріңсіңдер. Аға ұрпақ сендер үшін қолдан келгеннің бәрін жасады, енді сендердің де күш-қайрат жұмсайтын кездерің келді. Жамандықтан, жат әдеттен сақтанып, игі істер жасауға ұмтылыңдар. Үлкенге – ізетті, кішіге – қамқор, бір-біріңе дос болыңдар. «Біріңді, қазақ, бірің дос көрмесең – істің бәрі бос» деген Абай аталарыңның өсиетін ешқашан естен шығармаңдар».
Даналық биігі деген – осы. Барлығымыз осы өсиетті басшылыққа алып, бірлікте болайық, ағайын!
Тұрдықұл ШАҢБАЙ,
Абай музейі директорының міндетін атқарушы
БІРЛЕСЕ ОТЫРЫП ЖЕҢЕМІЗ
Елбасымыз Нұрсұлтан Назарбаевтың коронавирус індеті мен әлемдік экономикалық дағдарысқа байланысты «Бірлесе білген ел бәрін жеңеді» атты мақаласында айтылған ойларын қанағат сезіммен қабыл алып отырмыз.
Тұтқиылдан келген коронавирус дерті барша адамзатқа қауіп-қатер төндіріп отырғанын ескерткен Елбасы «қатерлі дертке әлем мемлекеттері бірлесе дауа іздеп, бүгінгі заманның бар күш-қуатын, ақыл-ойы мен ғылым-білімінің жетістігін ортақ мақсат жолына бірлесе жұмылдырып, ынтымақтаса әрекет етіп жатқанын» атап көрсетті.
«Кәсіпкерлерге де арнайы айтарым бар: сіздер тәуелсіздіктің арқасында өз істеріңізді қалыптастырып, аяқтарыңызға нық тұрдыңыздар, мол дәулетке кенелдіңіздер. Енді «Мен еліме не беремін?» дейтін кездеріңіз де келді. Осы орайда, менің өтінішім бойынша өз отандастарына қол ұшын беріп, қаржылай, заттай көмектесіп жатқан кәсіпкер азаматтар баршылық. Осы бір жарасымды үрдіс, игі іс одан әрі жалғасын табады деп сенемін»,- деді Елбасы.
Елбасы үндеуіне үн қосқан Сәтбаев ауылдық округінің жастары мен кәсіпкерлері қауіптің алдын алуға бір кісідей жұмыла отырып, Президентіміз Қ.Тоқаевтың бастамасымен қолған алынған «Біз біргеміз» акциясына белсене атсалысуда. Әлем жұртшылығын алаңдатып отырған бұл індетті барша қазақстандықтар бірлесе отырып жеңетінімізге сенеміз.
Ж.ҚАЙЫРБЕКОВА,
әлеуметтік қызметкер,
Тарбағатай ауданы{jcomments off}
