Шығыс Қазақстан облысының әкімі Даниал Ахметов Семейге жұмыс сапарымен келді. Сапары барысында аймақ басшысы «Адал» дүкендер желісінің қызметімен танысты. Сонымен қатар Абай театрындағы жөндеу жұмыстарын барып көріп, Орталық саябақтағы жаңғырту жұмыстарын бағамдады.
2 сәуірден бастап қала әкімдігі «Адал» супермаркеттерімен және «Адал-фарм» дәріханаларымен бірлесе отырып, қарттар мен мүгедектерге ең қажет заттарды жеткізу жұмыстарын ұйымдастырды. Ол үшін 52-12-12 нөмірі бойынша қоңырау шалып, тапсырыс беру жеткілікті. Азық-түлік пен дәрі-дәрмектерді Жастар ресурстық орталығының еріктілері керекті мекенжайға жеткізіп береді. Тапсырысты аптасына бір рет жасауға болады. Байланыс орталығының мамандары тапсырыстарды таңертеңгі 7.00-ден бастап 19.00-ге дейін қабылдайды. Сәуірдің екісінен бүгінгі күнге дейін 1200 тапсырыс қабылданған. Облыс әкімі Даниал Кенжетайұлы супермаркеттің жұмысына оң баға берді.
Келесі кезекте облыс басшысы Абай атындағы театрға бас сұқты. Қазіргі мұнда ұлы ақынның 175 жылдық мерейтойына орай жөндеу жұмыстары толыққанды жүргізіліп жатыр.
Театр директоры Яков Горельниковтің айтуынша, өткен жылдың қыркүйегінде жөндеу жұмыстарына қаражат бөлініп, өнер ордасындағы стендтер жаңартылып, ғимаратқа әктеу, бояу жұмыстары жүргізілген. Заманауи дыбыстық және жарық беру жабдықтары сатылып алынған.
— Біздің театрда мұндай ауқымды жөндеу жұмыстары бұған дейін болған емес. Енді ғимаратымыз жаңаша кейіпке енетін болады. Биыл театрды күрделі жөндеуге облыстан қомақты қаражат бөлінді. Ғимараттың шатыры, баспалдақтары мен қасбеті жөндеуден өтеді, сонымен бірге театр аумағын абаттандыру жұмыстары да жүргізіледі. Абайдың 175 жылдығына арналған ең маңызды іс-шаралар біздің театрда өтеді, сондықтан да біз қонақтарды лайықты қарсы алуымыз керек, — деді Яков Горельников.
Театр директорының айтуынша, ғимараттың іші де өзгереді. Екінші қабаттың фойесі де көрермендерді жаңа келбетте қарсы алатын болады. Көрермендер залы да жаңартылады. Абайдың мерейтойына орай театр әртістері енді жаңартылғпн сахнаға шығады, қазіргі уақытта еден жабыны төселуде.
Гримерлік және дайындық бөлмелерінде де жөндеу жұмыстары жүргізіледі. Театрдың шығармашылық құрамы төтенше жағдай режиміне байланысты уақытша мәжбүрлі демалысқа шыққанымен, жұмыс тоқтаған жоқ. 15 күннен кейін көрермендер онлайн-режимде «Ревизор» қойылымы тамашай алады.
Облыс әкімі Даниал Ахметов театрдың түс гаммасына мұқият қарауды ұсынды.
— Түрлі түсті бояулардың қажеті жоқ, колористиканы сақтаңыздар. Металл қоршауларды безендіруге де назар аударыңыздар. Біз мұнда халықаралық ғылыми-тәжірибелік конференция өткіземіз, сондықтан да дизайн мәселесі жақын арада шешіледі деп үміттенемін,– деді Даниал Ахметов.
Облыс басшысы сапарының соңында жаңғырту жұмыстары жүргізіліп жатқан Орталық саябақ пен алдағы уақытта Ибраев көшесі мен Мәңгілік Ел көшесінің қиылысында құрылысы жоспарланып отырған жаяу жүргіншілерге арналған көшенің орнын барып барып көрді. Аталған орын үш ай ішінде абаттандырылуы керек.
— Мұнда серуендеуге келетін жастар шетелде бізден әдемі деген ойда болмаулары керек. Келушілерді тамсандыратындай тамаша демалыс орындарын жасау біздің де қолымыздан келеді. Бұл 300 метрлік демалыс орны Еуропадағыдан кем болмауы керек. Ол үшін бізде қаражат бар, — деді Даниал Ахметов.
Сонымен,1 шілдеге қарай Семейде жаяу жүргіншілерге арналған көше пайда болады. Облыс әкімі жергілікті атқарушы билікке демалыс орнының заманауи дизайнын жасауды тапсырды.
— Адамдар атмосфераның өзгерісін сезінулері керек. Бұған дизайнерлік шешімдер көмектеседі. Жұмыстарды 1 шілдеге дейін аяқтау қажет,- деп тапсырды облыс әкімі.
Орталық саябақты аралап шыққан Даниал Ахметов қайта қалпына келтіру жұмыстарын 1 маусымға дейін аяқтауды тапсырды.
Жұмыс сапарының соңында аймақ басшысы журналистерге сұхбат беріп, облыс тұрғындарына үндеу жолдады:
– Егер біз өз балаларымыз бен немерелеріміздің амандығын ойласақ, олардың бақытты болғанын қаласақ, шектеу шараларын қатаң сақтауымыз керек. Көлік санының айтарлықтай азайғанына разымын, бірақ әлі де қысқарту керек. Еш қажетсіз үйден шықпаңыздар — бұл коронавируспен күрестегі жалғыз тәсіл,- деді Даниал Ахметов.
Семей қаласының ақпараттық орталығы{jcomments off}
