Қазақстан Республикасының Тұңғыш Президенті Нұрсұлтан Назарбаев жуырда жарияланған мақаласында елімізді береке-бірлікке шақырып, қазіргідей өтпелі кезеңде халықтың жұдырықтай жұмылуы қажеттігін ерекше айтып өткені белгілі. Осы орайда Семей өңірінде де аз қамтылған отбасыларға, көп балалы жанұяларға, мүмкіндігі шектеулі жандарға ел Президенті Қасым-Жомарт Тоқаевтың тапсырмасымен қолға алынған «Біз біргеміз!» акциясы аясында қолдау көрсетілуде.
Аталмыш акция аясындағы жұмыстарды облыс әкімі Даниал Ахметов өзі басшылыққа алған болатын. Соның нәтижесінде бүгінгі таңда өңіріміздің еріктілері де қарттар мен мүгедектерге медициналық бетперделер, азық-түлік, дәрі-дәрмек жеткізіп, әлемді шарпыған індетпен аянбай күресіп жатқан дәрігерлерге, блокпостарда тұрған полицейлер мен әскерилерге қолдау көрсетуде. Мұндай шараларға бірінші кезекте жергілікті Жастар ресурстық орталығының белсенділері, «Nur Otan» партиясының қалалық филиалы, жергілікті кәсіпкерлер, меценат азаматтар, мешіттер жамағаттары атсалысуда.
Бүгінгі таңда қала бойынша күшейтілген шектеулер енгізілген кезде еріктілер қауымы көптеген игілікті шараларға білек сыбана кірісіп жатыр. Атап айтсақ, олар қарттар мен мүгедектерге ең қажет заттарды үйлеріне дейін жеткізіп беруде. Тапсырысты телефон арқылы береді. Байланыс орталығының мамандары өтініштерді 07.00-ден бастап 19.00-ге дейін қабылдайды.
Қайырымды азаматтар бірінші кезекте Семей қаласында тұратын көп балалы аналардың мұқтаждығын өтеуде. Солардың бірі — атаулы әлеуметтік көмек алатын бес балалы ана Майраш Сұлтанбекова. Қаламыздағы Қарағайлы ықшам ауданынан пәтер алып, баспаналы болған Майраш Мұратбекқызы қайырымдылық шараларын ұйымдастырушы жандарға шексіз риза екенін айтады. Расында да, қазіргідей қиын сәттерде қоғамның әлеуметтік жағынан әлсіз топтары үшін мемлекет тарапынан қамқорлық шаралары ұйымдастырылуда. Бұл ретте көмек алған көп балалы аналар да алғыстарын білдіруде.
— Семейлік еріктілерге ана ретінде айтар алғысым зор. Жуырда «Біз біргеміз!» әлеуметтік жобасы аясында қаламыздың жастары үйімізге келіп, азық-түлік әкеліп берді. Оның сыртында «Біргеміз» қорынан 50 мың теңге қаржылай көмек те алдым, — дейді семейлік белсенділерге ақжарма алғысын білдірген Майраш Мұратбекқызы.
Сонымен қатар еріктілер қауымы тәртіп сақшыларымен бірге тұрғындарға төтенше жағдай кезіндегі шектеулер туралы түсіндіру жұмыстарын да жүргізеді. Қаламыздың еріктілері тұрғындарға коронавирус инфекциясынан сақтанудың жолдары көрсетілген жаднамалар таратып шықты. Кейіннен бұл акцияны облысымыздың басқа қалалары мен аудандарындағы волонтерлік штабтар да қолдады.
ШҚО Жастар ресурстық орталығының директоры Арайлым Есімбекованың айтуынша, бүгінгі таңда өңірімізде 1000-ға жуық ерікті түрлі шараларға атсалысуда. Оның ішінде Өскеменде 110, Семейде 70 адам азық-түлік тасымалымен айналысуда. Олар медициналық маскалармен, колғаптармен, қорғаныс костюмдерімен және антисептиктермен толықтай қамтамасыз етілген. Бүгінде еріктілер қатарына қосылғысы келген жастар облыстық Жастар ресурстық орталығына хабарласуда. Осыған қарап облыс әкімі Даниал Ахметовтің үндеуіне үн қатып, қайырымдылық шараларына атсалысуға ниетті белсенділер аймағымызда көп екенін аңғаруға болады.
Сонымен қатар аймағымызда қолға алынған игілікті істердің бірі «Қайырымды көршілер» акциясы десек қателеспейміз. Еріктілер мұқтаж жандардың барлығын анықтай алмайды. Сол үшін де белсенді жастар: «Өз көшеңіздегі қазыналы қарттарға, мүгедектерге сіздің көмегіңіз қажет. Дүкенге барғанда олардың да керек заттарын ала келсеңіз, нұр үстіне нұр»,- деп әлеуметтік желілер арқылы бейнероликтер таратып, сауапты іске шақыруда. Осындай сын сағатта волонтерлер жұдырықтай жұмылып жұмыс істеуде. Олардың арасында аз қамтылған отбасыларға қаржылай қолдау көрсетіп жатқандар да бар. Қаржылай көмек демекші, қазіргі таңда «Nur Otan» партиясының бастамасымен қолға алынған «Біргеміз!» жобасы аясында мұқтаж отбасыларға 50 мың теңгеден көмек беріліп жатыр. Алдағы уақытта мұндай көмектің екінші легі басталмақ.
Өңір бойынша бүгінде 12 мыңнан астам адам 42 500 теңге көлеміндегі әлеуметтік төлемді алып үлгерген. Бұл тізім әлі де толығатыны белгілі. ШҚО ақпараттық орталығының мәліметіне сүйенсек, жалпы өтініш білдіргендер саны 100 мыңға жуық екен. Осы орайда ШҚО әкімі Даниал Ахметов «Қазпошта» мен банк бөлімшелеріндегі қызметкерлер санын 900-ден 1500-ге дейін арттыруға шешім қабылдаған болатын. Бұл халыққа уақтылы қызмет көрсету үшін қажет. Барлық бөлімшелердің жұмыс уақыты есепшот ашуға келген халыққа қолайлы қызмет көрсету мақсатында кешкі сағат 21.00-ге дейін ұзартылған. Бұл күндері жұртшылық демалыс күндері де арнайы әлеуметтік есепшот ашып, жәрдемақы алып жатыр.
Әлібек КЕМЕЛХАН, «Семей таңы»{jcomments off}
