Игі істер туған жерге деген махаббаттан туындайды. Өзінің туып-өскен жерінің көркеюіне, гүлденуіне ерекше іңкәрлікпен үлес қоса білген азамат тұтастай бір елдің игілігі үшін қызмет ете алады. Ел дегенде еміреніп, жұрт дегенде жүгініп қызмет ету білімнен емес, туған жерге деген сүйіспеншіліктен десек, ешкім жоққа шығара қоймас. Осы сөзімізді Алаш арысы Әлихан Бөкейханұлының «Халыққа қызмет ету – білімнен емес мінезден» деген нақылы растап тұрғандай. Ел басына күн туғанда халқымен бірге болу, жұрттың қамын жеу — нағыз патриотизм!
Қайда жүрсе де туған өлкесін, туған халқын естен шығармай, таршылық көргендерге қол ұшын созуға асығып тұратын нағыз патриоттар елімізде баршылық. Осындай халқының қамын ойлайтын азаматтар жаһанды жайлаған індет біздің елімізге де жеткен кезде көмекке келіп, ауылдағы ақжүрек ағайынға қолдау көрсетуде. Сондай жандардың бірі КСРО және Қазақстанның еңбек сіңірген спорт шебері, Қазақстанның еңбек сіңірген қайраткері, Қазақстанның және Қырғызстанның еңбек сіңірген жаттықтырушысы, атымтай жомарт азамат Дәулет Болатұлы Тұрлыханов облысымыздың 6 ауданына, атап айтсақ, Абай, Аягөз, Жарма, Көкпекті, Тарбағатай, Үржар өңірлеріне жалпы көлемі 80 тонна болатын азық-түлік жіберіпті.
Қайырымдылық автокеруенінің алды қазіргі күндері кейбір аудандарға жетіп, балуанның жолдаған сәлемдемесі көп балалы отбасыларға және халықтың әлеуметтік жағынан аз қамтылған топтарына таратыла бастады.
Көмек керуені алғашқы кезекте күре жолдың бойындағы Аягөз ауданына келіп жетті. Автокеруенді бастап келген Азамат Тәңірбергенов қайырымдылық шарасын ұйымдастыруға Дәулет Болатұлының өзі тікелей жетекшілік еткенін айтады.
— Өзінің елін, туған жерін әсте естен шығармайтын қазақтың батыры Дәулет Болатұлы бізге осыдан бір апта бұрын хабарласып, көмек қолын созуға ниетті екенін жеткізген болатын. Бұл қамқорлығы өзге де азаматтарға үлгі боларлықтай,- дейді бұл ретте аудан әкімі Ділдабек Оразбаев.
Жіберілген азық-түлікті жергілікті «Nur Otan» партиясы филиалы қабылдап алыпты. Қазіргі күні Аягөз ауданы бойынша жалпы саны 720 әлеуметтік тұрғыдан аз қамтылған отбасы бар екен. 17 адамнан тұратын арнайы комиссия құрылып, бұл көмек аудандық әкімдіктің назарға алуымен мұқтаж жанұяларға үлестірілді.
Дәулет Болатұлының қайырым-дылық керуені өзінің туған мекені Жарма ауданына да жетті. Меценат азаматтың жанашырлығы жайында аудан әкімі Ахметқали Ахашұлы фейсбук әлеуметтік желісінде ізгі лебізін жеткізіп, жерлестерінің атынан алғыс білдірді.
«Елімізде енгізілген төтенше жағдайға байланысты қоғамның әлжуаз топтарын қолдау мақсатында «Біз біргеміз» акциясы аясында түрлі игілікті шаралар қолға алынуда. Бұл игі іске Жарма жұртшылығы да бір кісідей атсалысып келеді. Осындай ізгілікті іске даңқты палуан, жерлесіміз Дәулет Болатұлы Тұрлыханов та үн қосып, азаматтық ұстанымын танытып, облысымыздағы 6 бірдей ауданға гуманитарлық көмек жолдаған болатын. Күні кеше ғана жеткізілген азық-түліктерді аудандағы аз қамтамасыз етілген отбасыларға жеткізу мақсатында арнайы комиссия жасақталып, еріктілердің күшімен әр отбасыға бөлініп, бүгін бекітілген тізім бойынша округтердегі жанұяларға жолданды. Батыр палуанның жіберген сәлемдемесі 400-ге жуық қолдауға мұқтаж отбасының шаңырағына жылылық ұялатты.
Туған өлкесі Жарманың жалауын биік ұстаған Дәулет Болатұлының қамқорлығын жерлестері әрдайым сезініп келеді. Халқының қамын ойлаған азамат ел басына түскен осынау ауыртпалық кезеңде жерлестеріне қамқорлық танытуы арқылы өскелең ұрпаққа өнеге, өзгелерге үлгі болып отыр.
Алып тұлғасын еңбегімен танытып келе жатқан Дәулет Болатұлына деген Жарма халқының ықыласы қашанда ерекше. Қолда барымен бөлісіп, қамқорлық танытқан жерлесімізге қайырымды ісі үшін жармалықтардың атынан риясыз алғысымызды білдіре отырып, ел игілігі жолындағы еселі еңбегіне табыс тілейміз!»– деп жазды аудан әкімі өз парақшасында.
Халықтың жанашыры, тектінің тұяғы Дәулет Тұрлыхановтың жолдаған қайырымдылық көмегі өткен аптада облысымыздағы Абай ауданына да жеткізілді.
Жалпы жиыны 2 тонна ұн, 1 тонна күріш, 2,5 тонна қант, 1 тонна макарон өнімдері, 1500 литр өсімдік майы, 600 дана кір сабын Абай ауданындағы аз қамтылған, көп балалы жанұяларға, жалғыз басты қарияларға, мүмкіндігі шектеулі жандарға — барлығы 150 отбасыға таратылды.
«Адал ұл ер боп туса — ел тірегі». Осындай қиын-қыстау кезеңде халықпен бірге болып, елді береке-бірлікке шақырып, жанды қолдау білдіріп жатқан атымтай жомарт азаматтың бұл игілікті ісі көптеген отбасылардың дастарқанына ырыс болып құйылғаны анық. Ұлы ақынның өсиетін бойтұмардай қастерлеп, ұлылар мекеніне үлкен құрметпен қарайтын Дәулет Болатұлының осынау жанды көмегіне абайлық ағайын шынайы ризашылығын білдіруде.
— Дәулет ағаның төтенше жағдай кезінде бізге көмекке келіп, азық-түлік жібергеніне шексіз алғысымызды айтамыз. Ел ағаларының халқымен бірге болып, қарапайым ауыл тұрғындарына жанды қолдау көрсетіп жатқанына қуаныштымыз. Шынайы ниетпен ұсынған көмегі үшін Дәулет Болатұлына Алла разы болсын! – дейді Қарауыл ауылының тұрғыны Кәмшат Әбеуова.
Көмек керуенін күтіп алған Көкпекті тұрғындары да ризашылықтарын білдіруде.
— Сәуірдің 15-і күні Көкпекті ауданына меценат жерлесіміз Дәулет Тұрлыханов жолдаған гуманитарлық көмек келіп жетті. Өңірімізге келген бұл қайырымдылық жәрдемді аудан әкімі Асхат Сайдахметұлы бастаған жұмыс тобы қарсы алып, керуенді бастап келген өкіліне Дәулет Болатұлына бағытталған халықтың лебізін жеткізіп, алғыс хат табыстады. Аудан басшысы арнайы құрылған комиссия мүшелеріне Дәулет Болатұлы жолдаған көмек қорын 250 отбасыға қажеттіліктеріне сай әділ бөліп беруді міндеттеді,- дейді Көкпекті ауданы әкімінің аппарат басшысы Бек Нұғыбаев.
Қазіргі таңда алты ауданның тұрғындарына ұн, қант, күріш, май сияқты ең қажетті азық-түлік өнімдері таратылып жатыр.
— Дәулет Болатұлы туған өлкесіндегі жерлестерін еш ұмытпайды. Жаһанды жайлаған індет кезінде әлеуметтік жағдайы күрт төмендеп кеткен жандарға көмек беруді азаматтық парызы санайды, — дейді бұл ретте осы игі шараны ұйымдастырушылардың бірі Жандос Ілиясов.
Балуанның сәлемдемесі Тарбағатай ауданына да жеткізілді. Жолданған көмекті тарбағатайлықтар да ризашылық сезіммен қабылдап алды.
— Қазақтың даңқты балуаны, атақты меценат, грек-рим күресінен жеті рет КСРО чемпионы, бірнеше дүркін Еуропа, Азия чемпионы, олимпиада ойындарының күміс жүлдегері атанған Дәулет Тұрлыханов жерлестеріне әрдайым қолдау көрсетіп келеді. Бүкіл әлем елдерінің алаңдаушылығын тудырып отырған коронавирус инфекциясының тарауына жол бермеу мақсатында Қазақстанда төтенше жағдай жарияланды. Еліміздің шығысында да сақтық шаралары қолға алынып, халықтың жүріп-тұруына шектеулер енгізілген кезде, яғни сын сағатта атақты балуанның жерлестеріне тағы да көмек қолын ұсынуын үлкен азаматтық деп білеміз, — дейді ақжарма алғыстарын білдірген Тарбағатай халқы.
Дәулет Болатұлының демеушілігімен 16 сәуір күні Тарбағатай ауданына жалпы құны 3 млн теңгені құрайтын 12,1 тонна азық-түлік жеткізілген. Гуманитарлық көмекті Тарбағатай ауданының әкімі Серікқазы Садуақасов бастаған қоғамдық ұйым өкілдері, ақсақалдар қарсы алды. Аудан басшысы Серікқазы Құсайынұлы қазақтың батыр ұлы Дәулетке жұртшылық атынан алғысын білдірді.
КСРО спорт шебері Болат Оразғалиев, қарт ұстаз Совет Болысбаев, еңбек ардагері Әбдікәрім Ахметкәрімовтер де осындай қиын кезеңде халыққа қолдау білдірген атақты палуанға ризашылықтарын жеткізді. Ауданға жеткізілген азық-түлік барлық ауылдардағы әлеуметтік жағынан аз қамтылған отбасыларға таратылды. Ақсуат ауылдық округінің әкімі Ғалымжан Нұғиев алғашқы көмекті еңбек ардагері Әбдікәрім Ахметкәрімовтің үйіне жеткізіп берді.
Бұл күндері Үржар өңіріне де қайырымдылық керуенімен 4 млн 350 мың теңге көлемінде бірінші қажеттіліктегі азық-түліктер — ұн, қант, күріш, макарон өнімдері, күнбағыс майы және басқа да халық тұтынатын тауарлар жеткізіліп, әлеуметтік тұрғыдан аз қамтылған отбасылар мен жалғызілікті қарттар, көпбалалы отбасыларға үлестірілді.
Қайырымдылық көмекті қабылдап алған үржарлық азаматтар, аудан әкімінің орынбасары Біржан Тұрлыбеков Дәулет Тұрлыхановтың өкіліне аудан әкімі Нұржан Тоқсейітовтің алғыс хатын табыстап, жанашырлық танытқан жерлесімізге ізгі тілектерін жолдады. «Құрметті Дәулет Болатұлы! Елі сүйіп, қадірлеген, қандай қызметте болмасын жоғары жауапкершілік, адалдық сияқты адами қасиеттерді ту еткен сіздей жерлесімізбен мақтанамыз. Отбасыңызға береке-бірлік, амандық тілейміз»,- деп жазылған алғыс хатта.
Елінің қамын жеген арда ұлдарына разы болған үржарлық аналардың атынан ауданның Құрметті азаматшасы Рысхан Жанкүшікова алғыс білдірсе, аудандық ардагерлер кеңесінің төрағасы Нұрланбек Сандыбаев, аудандық қоғамдық кеңестің төрағасы Мұхаметқали Бітімбаев сынды ақсақалдар ақ баталарын берді.
Сын сағатта сүйеу болып, халқына қолдау көрсеткен Дәулет Болатұлының көмегін жерлестері ерекше ықыласпен қабылдады.
Хамза СӘТИЕВ,
Ақерке АЛТЫНБЕКОВА,
Әлібек КЕМЕЛХАН,
«Семей таңы»{jcomments off}