Соңғы жылдары қазақстандық туристердің ғана емес, шетелдіктердің де назарын өзіне аударып, танымал демалыс орындарының біріне айналған айдынды Алакөл жағалауы жыл сайын көркейіп келеді. Облыс әкімі Даниал Ахметовтің тапсырмасымен көл жағалауын абаттандыру жұмыстары биылғы жылы да жалғасын таппақ.
Өткен жылы Қабанбай ауылынан Алакөл көлінің жағалауына дейінгі аумақты абаттандыруға 399,7 млн теңге қаражат бөлінген болатын. Бүгінгі күні ұзындығы 2,5 шақырым болатын велотротуардың құрылысы және автотұрақ аумағын абаттандыру, модульдік сауда павильондарын орнату жұмыстары жүріп жатыр. Алдағы уақыттарда көгалдандыру, велотротуарды бояу, су резервуарын, суару жүйесін, айдау сорғыларын орнату сынды жұмыстар атқарылатын болады.
— Ағымдағы жылы ауданда 43 инфрақұрылымдық жоба іске асырылады. Көл жағалауындағы су құбыры, электр желілерінің құрылысы, жолдарды орташа жөндеуден өткізу жұмыстары жақын күндері басталады. Үстіміздегі жылы сонымен қатар аудан орталығындағы бассейн, Мақаншыдағы спорт модулі нысанының құрылысын аяқтау жоспарлануда. Аудандағы абаттандыру жұмыстарына, жолдарды жөндеуге қосымша 500 млн теңге, жаңа дәрігерлік амбулатория құрылысына 200 млн теңге қаржы бөлінетін болады,– деді облыс әкімі Даниал Ахметов Үржар ауданына жұмыс сапарымен келгенде.
Алакөл көлінің жағалауына модульдік әжетханалар мен құтқару бекетін орналастыру жұмыстары да осы жылға жоспарланған. Аталған жоба аясында қолда бар 2 модульдік санитарлық-гигиеналық әжетханаларды іске қосып, қосымша 4 жаңа модульдік санитарлық-гигиеналық әжетхана сатып алу, құтқару бекетін нормативтік талаптарға сәйкес жабдықтау, киінуге арналған қосымша кабина қою, құтқару мұнарасын, жағажайға тыйым салу және ескерту белгілерін, ақпараттық стендтер, тақтайшалар, буйкалар орнату, шағын көлемді су кемелеріне арналған жеке тұрақ салу жұмыстарын іске асыру көзделіп отыр. Аталған жобаны жүзеге асыруға 40,0 млн теңге бөлініп, бүгінгі күні мердігерді анықтау мақсатында байқау жарияланды.
— Биылғы жылы көл жағалауында бірқатар жұмыстар атқарылуы тиіс. Осы ретте орынбасарым Дидар Хамитов пен жауапты басшыларға Арбат пен жағалауды одан әрі абаттандыру бойынша нақты тапсырмалар бердім. Саябақты жөндеуге де баса назар аударамыз. Таяу уақытта туристік кешенде құрылыс жұмыстары басталады. Жалпы, ауданды абаттандыру шаралары да жалғасын табатын болады, – дейді аудан әкімі Нұржан Тоқсейітов.
А.Бакиртанова{jcomments off}
