Жақында Семей қаласының құрылыс бөлімінің басшысы Болат Жақаевтың қатысуымен онлайн – брифинг өтті. Қарағайлы шағын ауданында жүргізіліп жатқан құрылыс жұмыстары жайлы кеңінен баяндап берген Болат Жақаев БАҚ өкілдерінің тұрғын үйге қатысты көптеген сауалдарына жауап қайтарды.
Семейдің бас жоспарына сәйкес, бүгінде Қарағайлыдағы құрылыс қарқынды жүріп жатыр. Шағын ауданда кәсіпкерлік нысандарын ашуға қолайлы үлгіде салынған 20 көп қабатты үй пайдалануға берілген. Кварталаралық жолдар мен автокөлік қоятын орындар заман талабына сай жабдықталған. Көлік қоюға бір пәтерге шыққанда 1,5 метр орын бөлінген.
— Қазіргі таңда 20 көп қабатты үй пайдалануға беріліп, жалпы алаңы 95,883 мың шаршы метрді құрайтын 18 жаңа үйдің құрылысы жүргізілуде. Сонымен қатар жалпы алаңы 171, 600 мың шаршы метр болатын 43 тұрғын үйдің жобалық — сметалық құжаттары дайындалуда. 320 орындық балабақша пайдалануға берілді. 1200 орындық мектеп пен 320 орындық балабақша құрылысына жер телімдері бөлініп отыр. Бүгінгі күні тағы бір мектептің құрылысына жобалық — сметалық құжаттар әзірленуде. Жаңа ауданда тағы да бес мектеп салу жоспарланып отыр. Алдағы уақытта 150 орындық оңалту орталығының да құрылысы басталады. Шағын ауданда, төтенше жағдайға қарамастан, құрылыс жұмыстары тоқтаусыз жүріп жатыр, — деді Болат Жақаев.
Бүгінгі күндері сондай-ақ қаламыз арқылы өтетін Омск — Майқапшағай (Павлодар тас жолы) күре жолының ұзындығы 2,5 шақырымдық учаскесін жөндеу жұмыстары атқарылуда.
Қарағайлы шағын ауданындағы спорттық-мәдени кешен мен саябақты және Назарбаев Зияткерлік мектебінің араларын жалғайтын екі көше толықтай жөндеуден өткізіліп, абаттандыру жұмыстары жүргізілмек. Жаяу жүргіншілер осы жолмен Арбатқа қарай өтететін болады.
Қарағайлыда Мұз сарайы салынатыны көпшілікке белгілі. Бұл нысанда екі хоккей алаңы және допты хоккей алаңы жасалмақ, мұндағы трибунаның сыйымдылығы 1000 адамды қамтитын болады. Аталған алаңдардың жобасын мемлекеттік-жекеменшік әріптестігі аясында алматылық кәсіпкерлер дайындап жатыр.
Ағымдағы жылы Қарағайлы шағын ауданы аумағының солтүстік жағын 90,0 гектарға дейін ұлғайтуға байланысты жұмыстар басталды. Бұл аумақта 80–нен астам көп қабатты тұрғын үйдің құрылысы жаспарланып отыр. Сондай-ақ мектептерді, өрт сөндіру депосын және әлеуметтік нысандарды салу көзделуде.
Алдағы уақытта 32 000 отбасы Қарағайлы ауданынан баспана алады деп жоспарлануда.
Мақпал МАРАТҚЫЗЫ, «Семей таңы»
{jcomments off}
