Шығыс Қазақстан облысының әкімі Даниал Ахметов 7 мамыр күні жұмыс сапарымен Абай ауданына келіп, Ұлы Абайдың 175 жылдық мерейтойына дайындық жұмыстарын тексерді.
Аймақ басшысы бұл жолғы сапарында Ұлы Абайдың туған жеріндегі Сырт Қасқабұлақ стелласының құрылысымен танысты. Мұнда жұмыстың бірінші кезеңі орындалды. Ендігі кезекте Абай бұлағын абаттандыру міндеті тұр.
Осыдан соң Даниал Кенжетайұлы Ақшоқыдағы Құнанбай әулетінің қорымын көріп, хакімнің отбасына арналып жаңадан салынып жатқан мұражай құрылысымен танысты.
— Басты міндет — Ұлы Абайдың ата-анасына құрмет көрсету. Музей қазақ халқының құндылықтары мен ұрпақтар сабақтастығын сақтау тұрғысында аса маңызды нысан екенін ерекше атап өткім келеді, — деді Д.Ахметов.
Облыс басшысы сонымен қатар аудан орталығы Қарауылдағы жол жөндеу, абаттандыру, су құбыры жүйесін қайта жаңғырту жұмыстарын көріп, 300 орындық жаңа мектептің, Абай саябағының құрылысымен танысып, оң пікірін білдірді.
Жидебайдағы кешенде де ауқымды жөндеу жүргізілуде. Кешен түбегейлі жаңартылады, бірақ оның тарихи, сәулеттік келбеті сақталады.
— Кешенді аббаттандырып, жарықтандырамыз. Абайдың 175 жылдығы аясында жүзеге асатын барлық шаралар халықтың мүддесіне қызмет етуі тиіс. Келуші туристер Ұлы ақынның шығармашылығымен танысып қана қоймай, демалып, өлке тарихын зерттейтін болады. Сол үшін қолайлы жағдай жасауымыз керек, — деп атап өтті Даниал Кенжетайұлы.
Сапар соңында Даниал Кенжетайұлы барлық құрылыс жұмыстарын сапалы орындап, уақтылы аяқтауды қадап тапсырды.
«Жадыра ТӨЛЕГЕНҚЫЗЫ, «Семей таңы»{jcomments off}
