Семей қалалық мәдениет сарайы қызметкерлерінің ұйымдастыруымен және шаһардағы өнерпаздардың қатысуымен «Әйел – аққу, айдынында таранған» атты 8 Наурыз – Халықаралық әйелдер күніне арналған мерекелік кеш болып өтті. Кешке қаладағы іскер әйелдер, көп балалы аналар, ардагер ұстаздар қауымы шақырылды.
Айта кету керек, биылғы мерекелік кеш жылдағыдан өзгеше өрбіді. Ерекшелігі сол, Семей қаласындағы таланттардың басын қосқан жеке студиялардың өнерпаздары жиылып, концертке өз үлестерін айтарлықтай қосты. «Дариға — ай» жастар театры, қалалық мәдениет сарайының ұжымы сияқты мемлекеттік мекемелерден өзге, «Мәдениет» агенттігі, «Серілер», «Той — думан» той орталықтарында шеберліктерін шыңдап жүрген жас таланттар нәзік жандыларға әннен шашу шашты. «Рахмет» жайдарман командасының жас жігітттері де әдемі әзілдерін ұсына білді.
— Концертті халыққа жаңаша әрі өзгеше, көңілінде қалатындай етіп өткізуді мақсат еттік. Оның үстіне Семей қаласында жеке студиялардың жұмыстары жанданып, бойында өнері бар таланттардың жарыққа шығуына өз үлестерін қосып келе жатыр. Осы жекелеген студиялар, орталықтар мен мемлекеттік мекемелер ортасында өзара қарым – қатынас, әріптестік байланыс орнату арқылы Семей қаласының өнердегі салмағын арттыруды да көздеген едік. Бұл бір жағынан өнер бәсекесіне бейімделуге бастар жол. Ал, бәсеке болған жерде, қашанда нәтиже болатыны анық. Сондықтан, мерекелік концертте қаладағы орталықтардың, студиялардың басын қалалық мәдениет сарайының сахнасында топтастырдық. Мұндай концерт Семей қаласында бірінші рет ұйымдастырылып отыр, — дейді сұхбат кезінде қалалық мәдениет сарайы директорының орынбасары Болатхан Айтмұхамбетов.
{jcomments on}Біріншіден, бәсеке бар жерден нәтиже күтуге әбден болады. Екіншіден, Семейдің өнерін өрге сүйреп жүрген жастар үшін жақындасудың, ортақ көзқарас қалыптастыру тұрғысынан да тиімді тұстары көп. Ал, мерекелік концертке келгендер сахна төріндегі өнерпаздардан осы қасиеттерді көре алды деуге болады.
— 8 Наурызға арналатын концерттің болатындығын жақындарымнан естіп білдім. Баруға бел байладым. Бұл жолғы мерекелік кеш өзгеше өтті. Келгеніме қатты қуандым. Болашақта да осындай танымы терең, талғамы өзгеше концерттер ұйымдастырылып тұрса жақсы болар еді. Көңіліміз көтеріліп, сергіп қайтып барамыз, — деді қала тұрғыны Гүлмира Төлебаева.
Ерзат ЖАНАТҰЛЫ,
«Семей таңы»
