Коронавирустық инфекцияның бүкіл әлемде таралуы елдің денсаулық сақтау жүйесі үшін күрделі сынға айналды және осы саладағы бірқатар кемшіліктерді де анықтап берді. Бұл туралы Мемлекет басшысы Қасым-Жомарт Тоқаев Ұлттық қоғамдық сенім кеңесінің үшінші отырысында сөйлеген сөзінде айтты.
Мемлекет басшысы білікті мамандардың тапшылығы, дәрігерлер жалақысының төмендігі және денсаулық сақтау жүйесіндегі басқа да проблемалар жайлы сөз қозғады. Бұл мәселелерді шешу ең алдымен дәрігерлердің еңбекақысының кезең-кезеңімен көтеруден басталады. Дәрігерлердің жалақысы орташа жалақыдан кемінде екі жарым есе жоғары болуы керек. Бұл мақсаттарға 2023 жылға дейін қол жеткізу жоспарланған. Қазіргі уақытта дәрігерлердің жалақысы елдегі басқа салалардағы мамандардікімен салыстырғанда ең төмен болып саналады. Біз, денсаулық сақтау саласының өкілдері, мұндай шаралардың қабылдануы отандық медицина қызметкерлерінің әлеуметтік-экономикалық жағдайын жақсартуға және осы салаға жас мамандарды тартуға мүмкіндік береді деп санаймыз.
Медицина саласында жас кадрлардың қатысуынсыз ұрпақтар сабақтастығы мен жаңа инновацияларды енгізу мүмкін емес екенін түсінуіміз керек. Денсаулық сақтау саласына жас дарындардың келуі дамуға жаңа серпін беретіні сөзсіз.
Реформалар дәрігерлердің құқығын қорғауға да әсер етеді. Атап айтқанда, бірқатар салаларда қылмыстық қудалау шараларын, оның ішінде клиникалық сынақтарды өткізу тәртібін бұзғаны үшін жауапкершілікті қайта қарау жоспарлануда. Өйткені жазалану қаупі көптеген медициналық мамандардың кері шегінуін, білікті кадрлардың кетуін көбейтеді, талапкерлердің болашақ мамандығын таңдауына кедергі жасайды.
Жеңілдету шаралары дәрігерлерге артқа қарайламай, пациенттерді емдеуге толықтай көңіл бөлуге мүмкіндік береді. Сондықтан ұсынылған құқықтық және қаржылық қорғау жүйесі медициналық қызметкерлердің еңбек жағдайларын жақсартады деп үміттенеміз. Өйткені дәрігерлердің жұмысы жанкешті және аса жауапты екені жасырын емес.
Денсаулық сақтау жүйесін ғылымның көмегінсіз дамыту мүмкін емес. Дамыған елдердің жетістігі осыған негізделеді. Халықаралық тәжірибені ескере отырып, бізге ғылыми әлеуетті дамыту, жетекші шетелдік сарапшыларды тарту және заманауи әдістерді, сондай-ақ пандемия кезінде маңыздылығы айқын көрінген цифрлық технологияларды енгізу қажет.
Бұл бағытта Семей медициналық университеті айтарлықтай тәжірибе жинақтады — жаңа білім беру платформасы енгізілді, барлық білім беру бағдарламалары цифрландырылып, бейнедәрістер дайындалды. Алдағы уақытта бұл тәжірибені дамытып, кеңейту қажет.
Мемлекет басшысы коронавирустық инфекцияның қайтадан таралу ықтималдығын атап өтті. Осыған байланысты елімізде жұқпалы ауруларды емдеудің стандарттарына деген сұраныс артады. Денсаулық сақтау шараларының сапалық деңгейіне ерекше назар аударылады. Шынында да, коронавирустық пандемия бірқатар облыстарда мамандардың жетіспеушілігін анық көрсетті. Елде жұқпалы аурулар бойынша дәрігерлер, анестезиолог-реаниматологтер, пульмонологтер және санитарлық мамандар жетіспейді.
«Семей медициналық университеті» КеАҚ осы мамандықтар бойынша мамандар даярлау үшін қажетті ғылыми және клиникалық негізге ие. Мемлекеттік қолдау шаралары кадрлық жетіспеушілікті жоюға, жас талапкерлерді тартуға және коронавирус инфекциясы қайталанған жағдайда дайын болуға көмектеседі.
Мемлекет басшысы атап өткендей, Қазақстан жұқпалы аурулармен күрес саласындағы халықаралық ынтымақтастық деңгейін арттыруға ниетті. Сондай-ақ осы жылдың соңына дейін Қазақстан Республикасының биологиялық қауіпсіздігі туралы жаңа заң әзірлеу, денсаулық сақтау ұйымдарын импорт-алмастыру қағидаты бойынша дәрі-дәрмектермен қамтамасыз ету тәсілдерін қайта қарау жоспарланған. Отандық дәрі-дәрмек өндірісі де дамиды.
Үлкен ғылыми-клиникалық базасы бар елдегі іргелі университеттердің бірі ретінде Семей медициналық университеті осы бағыттардың барлығында көмек пен қолдау көрсетуге дайын.
Тасболат АДЫЛХАНОВ,
«Семей медицина университеті» КеАҚ клиникалық және радиациялық онкология кафедрасының меңгерушісі,
м.ғ.д., профессор{jcomments off}
