Биыл елімізде және шетелдерде қазақтың ұлы ақыны Абай (Ибраһим) Құнанбайұлының 175 жылдық мерейтойы аталып өтілуде. Осы айтулы оқиғаға орай, республикамыздың Ұлттық кітапханасының ұжымы «Абайдың ақын ұлдары» атты кітапты, көлемі 37,4 баспа табақ, жарыққа шығарды. Жинақ, өзінің аты айтып тұрғандай, хакім Абайдың дарынды ұрпақтарына арналған.
Кітапта ақынның ұлдары Ақылбай, Мағауия, Тұрағұл мен немересі Әубәкір Ақылбайұлының көркем туындылары және олардың өмірі мен шығармашылықтары туралы зерттеулер, эсселер мен мақалалар топтастырылған. Жинақтың алтын арқауы – ғұлама Мұхтар Әуезовтің, көрнекті абайтанушы-ғалым Қайым Мұхамедханұлының еңбектері.
«Абайдың ақын ұлдарын» оқырманға таныстыруға ұйытқы болып, ұсыныс жасаған – мемлекет және қоғам қайраткері, көрнекті ғалым, абайтанушы Құл-Мұхаммед Мұхтар Абрарұлы. Кітаптың жалпы редакциясын басқарған — Қазақстан Республикасы Ұлттық кітапханасының директоры, Қазақстандық кітапханалық одақтың төрағасы Оспанова Бақытжамал Қайырбекқызы.
Ал жинақтың құрастырушысы – Ұлттық кітапхананың ғылыми хатшысы, Қазақстан Жазушылар одағының мүшесі Жүнісбеков Болат Жүнісбекұлы. Осының алдында Ұлттық кітапхана ұлы ақынның 175 жылдық мерейтойына арнап Болат Жүнісбековтің «Абай сәулесі» атты зерттеулер мен мақалалар жинағын, көлемі 37,6 баспа табақ, басып шығарған еді.
Абайдың ақын ұлдарының өлеңдері мен аудармаларын оқи отырып, ұлы ақын әрі данышпан әкенің өмір мен өнер мектебінің мәуелі жемісіне тамсанып, «өлсе де өлмегенге тең» зор өнегеге тәнті боламыз. Кітап әдебиетсүйер қауымның және барша жұртшылықтың қызығушылығын туғызады деген сенімдеміз.
ҚР Ұлттық кітапханасының баспасөз қызметі{jcomments off}
