Облыс әкімі Даниал Ахметов Семей қаласының кәсіпкерлерімен онлайн режимінде кездесіп, шаһарда COVID-19 инфекциясының өршуіне байланысты бірқатар мәселелерді бірлесіп талқылады.
Жергілікті кәсіпкерлер аймақтың бас санитарлық дәрігерінің шектеу шараларын күшейту туралы қаулысына қатысты пікірлерін айтып, бизнес нысандарының алдағы уақыттағы жұмыс істеу тәртібін де белгіледі.
Баса айта кетер жайт, соңғы 10 күн ішінде біздің облыста коронавирус инфекциясын жұқтыру қарқыны айтарлықтай жоғарылап отыр. Ең қиын жағдай Семей қаласында орын алуда. Мұнда тұрғындардың вирусты жаппай жұқтыру деңгейі күн санап артып келеді. Аймақтағы 234 жағдайдың 162-сі Семейде тіркелген.
Облыс әкімінің айтуынша, коронавирус індетінің таралу себептері көп. Соның ішінде әсіресе тұрғындардың санитарлық талаптарға бейжай қарауы жағдайды ушықтырып отыр. Қарапайым ережелердің өзін өрескел бұзу фактілері де анықталған. Осыған орай облыстың бас санитарлық дәрігері шектеу шараларын күшейтуді ұсынды. Сондықтан аталған жиында санитарлық дәрігердің ұсынысы да бизнесмендердің бастамашыл тобымен бірге талқыланды.
— Мені кәсіпкерлердің бастамашылдығы мен ашықтығы ерекше қуантты. Олар коронавирустың жаппай өршуіне байланысты қалада қалыптасқан барлық жағдайды жақсы түсініп отыр. Сындарлы пікірлерін ортаға салып, бірге қарастырдық. Кездесу қорытындысы бойынша бизнес қоғамдастықпен бірлескен ортақ шешім қабылданды. Сонымен қатар бүгіннен бастап кәсіпкерлердің ұсынысымен Семейде мониторингтік топ құрылды. Олар енді санитарлық-эпидемиологиялық талаптардың орындалуын өздері бақылауға алады. Қазір біздің алдымызда тұрған басты міндет азаматтарымыздың денсаулығы мен өмірін сақтау екенін естен шығармайық, — деді Даниал Ахметов.
Тоқтала кетсек, соңғы он күннің ішінде облыста аурудың өсу деңгейі артып отыр. Әсіресе, жоғарыда айтып өткеніміздей, Семейдегі індеттің таралуы ауқымы бақылауға бағынбай отыр. Аймағымыздағы вирус жұқтырғандардың 70 пайызы біздің қалаға тиесілі екен.
Облыстың бас санитарлық дәрігері Марат Исмаиловтың айтуынша, барлығы 27 үй ошағында 82 адам, оның ішінде бір ошақта 12 адам, бес ошақта 4-тен, алты ошақта 3-тен, он алты ошақта 2 адамнан ауруға шалдыққан. Сондай-ақ вирустың еш симптомсыз таралу саны да артып келеді. Бұл ретте Семейде вирус белгілері байқалмайтын 103 адам бақылауға алынған.
Жалпы, облыс бойынша 151 инфекция ошағы бақылауға алынған, 1500-ден аса адам оқшауланған. Оның 26-сы карантиндік стационарға жатқызылып, 1486-сы үй карантиніне жіберілді. Бүгінде қалыптасқан жағдай жіті бақылауда.
«СТ» — ақпарат{jcomments off}
