Ақпан айында өткен «Сочи — 2014» қысқы олимпиадасына қатысып, жақында ғана туған қалаларына оралған семейлік спортшылар – Ердос Ахмадиев, Виктория Ланчакова, Галина Вишневскаяларды сәрсенбі күні тәуліктің екінші жартысында қала басшысы Айбек Кәрімов әкімдіктегі жұмыс кабинетінде қабылдады. Олимпиадашылармен кездесуге қала әкімінің орынбасары Зәуреш Исабаева мен қалалық спорт бөлімінің басшысы Мұрат Құржықаев және жаттықтырушы Рафаель Мерсалимов қатысты.
Ел намысын қорғап қайтқан семейлік спорт саңлақтарын жетістіктерімен құттықтап, барлық жанкүйер- лер мен спорт жанашырлары олимпиада кезінде олардың өнерін қалт жібермей қарап отырғандығын айтқан қала басшысы, әсіресе, Ердостың Қазақстан туын көтеріп шыққаны үлкен мақтаныш екенін атап өтті. Сонымен қатар, Галинаның олимпиададан кейін әлем чемпионатынан жеңіспен оралғанына қуанышты екенін жеткізген Айбек Мүталапханұлы олимпиадашыларға алғыс айта отырып, олардың басты жетістіктері алда екеніне сенім білдірді.
— Осы уақытқа дейін халықаралық және елішілік турнирлерде көптеген жетістіктерге жетіп жүргендеріңізден хабардармыз. Ал, Сочи олимпиадасы сіздер үшін жаңа бастама болды. Олимпиададан тәжірибе жинақта- дыңыздар. Енді бұл тәжірибелеріңізді алдағы олимпиадада көрсетерсіздер деген сенімдеміз, — деді А. Кәрімов өз сөзінде.
Сондай-ақ, қала басшысы шаһардағы қысқы спорт түрлерін дамытуда жергілікті билік тарапынан барынша жағдайлар жасалатындығын сөз етіп, елдің абыройын асқақтатып жүрген спортшылардың жетістігі олардың бапкерлерінің орасан зор еңбегі екенін де атап өтті.
Кездесуде спорт туралы ғана емес, тұрмыстық түйткілдер де айтылды. Жаттықтырушы Рафаель Мерсалимов үш спортшының да Семейге Үржар ауданынан көшіп келгендіктен, қазіргі күнде қалада баспаналары жоқ екендігін, әзірше олардың пәтер жалдап тұрып жатқандығын жеткізді. Қала әкімі баспана мәселесін үстіміздегі жылдың аяғына дейін шешіп беруге уәде берді.
— Біз сіздерге жағдай жасап, қолдау көрсетуіміз қажет. Өздеріңізді көрсетіп, Қазақстанды әлемге мәшһүр еттіңіздер. Сонымен қатар, жастармен де үлкен жұмыстар жасау керек. Олар сіздерден үлгі алып, сіздерді мақтан тұтады, — дей келе, — А.Кәрімов, — атқарушы билік тарапынан спортшыларға ұдайы көңіл бөлінуде. Оларға өткен жылы екі пәтердің кілті табыс етілсе, биыл үш пәтер берілмек, — деп атап өтіп, олимпиадашыларға мықты денсаулық, отбасыларына бақыт тіледі.
{jcomments on}Кездесу барысында спортшылар да қала басшысына қолдау көрсетіп отырғаны үшін алғыстарын жеткізді. Олар үшін Сочи олимпиадасы тек бастама екенін, алдағы олимпиа- даларда ел қоржынын жеңіспен толтыруға тырысатындықтарын айтты.
— Олимпиадада қолымыздан келгенін жасап, барынша тырыстық. Бірақ, бәрі мұнымен аяқталмайды. Спортта бәрі болады. Сондықтан да, біз бағындырар белестер әлі алда. Сіздерге үлкен рахмет. Бұйырса, алдағы уақытта жетістікті еселей түсіп, жанкүйерлерімізді қуанта береміз деп ойлаймын, — дейді Ердос.
Қазіргі уақытта спортшылар келесі жарыстарға дайындалып жатқандықтарын айтады.
Кездесу соңында олимпиадашылар қала басшысына Сочиден әкелген кәдесыйлары – олимпиадалық қонжық пен Қазақстан құрамасының «Жеңіске бірге жетейік» деген жазуы бар қысқы олимпиадаға арнайы тігілген спорттық киім жиынтығын сыйға берді. Ал, қаладағы құрметке лайық азаматтарға ғана берілетін әрі аса құнды саналатын, саны шектеулі бейбітшілік стелласы түріндегі кәдесыйларды спортшыларға тарту еткен Айбек Кәрімов Галина Вишневскаяның жаттықтырушысы Рафаель Мерсалимовке қазақтың салт-дәстүрі жазылған кітапты сыйлады.
Кездесуге келген олимпиадашылар қала әкімімен естелік суретке түсті.
Нұрдәулет КӘКІШЕВ,
«Семей таңы»
