Түркиядағы қазақ диаспорасы мен Нұр-Сұлтан қаласындағы дүниежүзі қазақтарын біріктіретін «Отандастар» қорының атынан Тарбағатай ауданына гуманитарлық көмек келді. Денсаулық қоғау саласына арналған көмекті Қазақ-Түрік білім және зерттеу қауымдастығы төрағасының бірінші орынбасары, дүниежүзі қазақтары қауымдастығының төралқа мүшесі Серқан Динчтүрк Тарбағатай ауданының орталығы Ақсуаттағы ауруханаға әкеліп тапсырды.
Түркиядан келген гуманитарлық көмекті тапсыру рәсіміне Тарбағатай ауданының әкімі Серікқазы Садуақасов, аудандық мәслихаттың хатшысы Сәумен Жақаев және аудандық орталық аурухананың бас дәрігері Алмагүл Әштаева, аудан әкімінің орынбасарлары Қайрат Мауадинов, пен Ержан Сабырбаев, Ақсуат ауылы ардагерлер алқасының төрағасы Болат Оразғалиев қатысты.
19 қорапқа салынған құны 5 миллион теңге болатын гуманитарлық көмекте тыныс алу аппараты, маска, халат және медициналық қорғаныс құрал-жабдықтары бар. Түркиядағы қазақтардың атынан келген көмек Нұр-Сұлтан, Алматы, Шымкент сияқты ірі мегополистерге жіберілген екен. Сол көмектің бір бөлігі Тарбағатай ауданының үлесіне тиіпті.
-Сіздерге Түркия халқының сәлемін жеткізіп тұрмын. Біздің әкелген көмегіміз коронавирус инфекциясын жеңуге көмектеседі деп үміттенеміз. Осы кеселден қайтыс болған марқұмдарға Алла иман байлығын берсін. Емделіп жатқан қандастарымызға шипасы тисін деп тілеймін,-деді дүниежүзі қазақтары қауымдастығының төралқа мүшесі Серкан Динчтүрк.
Түркиядан келген бұл көмекті коронавирус індетімен күрестегі жаһандық ынтымақтастықтың айқын көрінісі деп бағалаған Тарбағатай ауданының әкімі Серікқазы Құсайынұлы Түркиядағы қандастарымыздың сәлемін жеткізген Серкан Динчтүркке алғыс сезімін білдіріп, құрметпен иығына шапан жапты.
Тарбағатай ауданының әкімі Серікқазы Сәдуақасовтың үндеуіне үн қосқан Екпіннің тумасы, жерлесіміз, меценат Дулат Тастекеев Ақсуаттағы аудандық орталық ауруханаға «ИВЛ-РО 6» жасанды тыныс алу аппаратын, 2 (Прикроватные мониторы) төсектің қасында тұрып науқастың тыныс алуы және қанның оттегімен көректенгендігі мен қан қысымын өлшеп тұратын монитор, 10 дана (Плуьсоксиметр) өкпенің оттегімен қанды көректендіріп тұрған қабілетін көрсететін, 10 дана (термометр) жүрек қағысын көрсететін аппараттарды тапсырған еді.
Сонымен қатар Сәтбаев ауылының азаматы, атақты спортшв, әлем чемпионы Ықыбаев Дастан мен кәсіпкер Ықыбаев Рүстем Ақсуат ауруханасына он төрт оттегі аппаратын жеткізіп берген болатын. Бұған дейін облыстық денсаулық сақтау басқармасының тарапынан «Ана мен бала» орталығынан 1 тыныс алу аппараты, 2 төсектің қасында тұратын манитор көмекке беріген екен.
-Қиындықты береке-бірлік жеңеді. Бүгінгі тірлігіміз ел өмірінжегі сол береке-бірліктің көрінісі. Аудан халқына көмектерін жасап жатқан азаматтардың қатары көбеюде. Біз оған да қуанамыз. Көптеген мекеме, бөлім қызметкерлері, жеке азаматтарымыз емделіп жатқан науқастарға азық-түлік әкеліп, көмектесіп жатыр. Мақсатымыз аудан халқын осы кеселден аман алып шығу. Қиын кезеңде халыққа көмек қолын ұмынған азаматтардың барлығына, атап айтқанда Дулат Тастекеевке, ағайынды Дастан мен Рүстем Ықыбаевтарға, Қайнар Дүйсенов, Дархан Шотабаев, Болат Қойбағаров, Саян Садықов, Дастан Рахымбаев, Қайырлы Қасенов, Саят Садуанов, Кенжеюек Шыныбаев, Әділғазы Садықов, Айнұр Тұрсынбаева, Жандос Оразғалиев және «Біз біргеміз» қайырымдылық қорының жақтастарына халық атынан алғыс айтамын. Ауданымызға келген дүниені тиісінше Ақсуат пен Ақжарға бөліп бердік,-деді аудан әкімі Серікқазы Құсайынұлы.
-Негізі біздің аурухана 40 төсектік, бірақ қазіргі таңда 105 орын жабдықтап отырмыз. Сонымен қоса, 45 дәрігерлерге арнап төсектер салынған. Сонда 150 төсек салынып тұр. 45 дәрігер күндіз-түні халыққа қызмет етуде. Бүгінгі таңда 78 науқас емделуде. Медицина қызметкерлерінің де денсаулықтарын сақтауымыз керек. Арамызда ауырып жатқан қызметкеріміз де бар. Солардың бәрін емдеп шығу үшін қолдан келген шараларды іске асырып жатырмыз. Күніне 45 адам рентгенге түсіріліп жатыр. Рентген лаборанттарымыздың түсіргендерін жалғыз дәрігер оқып отыр. Ол да оңай жұмыс емес. Осында оқылған рентгендер қаладаға компьютерлік томографиялармен бірдей шығып жатыр. Бұл да біздің дәрігеріміздің біліктігінің дәрежесін көрсетсе керек. Облыс әкімі Даниал Кенжетайұлы мен облыстық денсаулық сақтау басқармасының басшысы Ильяс Тұңғышханұлының ауданымызға көңіл бөліп, жасап отырған қамқорлығына алғысымыз шексіз,- дейді Алмагүл Әштаева.
Х.СӘТИЕВ.
