Бірлігі мен берекесі артқан Бесқарағай өңірі күн санап көркейіп, ай санап абаттанып, тұрғындарының да әлеуметтік ахуалы жақсарып келеді. Жылдар бойы жөндеу көрмеген жолдар асфальтталып, көшелер жарықтандырылды. Білім саласы бойынша да қыруар жұмыстар атқарылып, жас ұрпақтың алаңсыз білім алуына жағдай жасалуда. Қай саланы алсақ та тарих қойнауына кеткен жылдармен салыстырғанда ілгерілеушілік басым.
Сөзімізге дәлер ретінде айтсақ, ағымдағы жылдың бірінші жарты жылдығында ауыл шаруашылығының жалпы өнім көлемі 115,5 пайызға, яғни 6,9 млрд теңгеге орындалды, тіркелген шағын бизнес кәсіпорындарының саны 105,6 пайызға, тұрғын үйді пайдалануға беру 2,2 есеге артты.
Бесқарағай ауданы үшін биылғы жыл бұрынғыдан өзгерек болғаны рас. Республикалық, облыстық деңгейде қаржыландыру бірнеше есеге артты.
— 2016 — 2019 жылдар аралығында аудан бюджетіне бір жобаға барлығы 354,5 млн теңге бөлінді, ал 2020 жылы Шығыс Қазақстан облысының әкімі Даниал Ахметовтің тапсырмасы бойынша 55 жобаны іске асыруға 1 873 млн теңге бөлінді. Оның ішінде республикалық және облыстық бюджеттен қаржыландырылатын 1 341,9 млн теңге сомасына 28 жоба және «Жұмыспен қамтудың жол картасы» бағдарламасы шеңберінде 531,2 млн теңгеге 27 жоба іске асырылды. Нақтырақ айтсақ, таза ауыз сумен қамтамасыз ету бойынша 14 жоба қолға алынды. 1 022 млн теңге қаржыға Долон, Қарағайлы, Қарабас, Бірлік, Қара-Мырза ауылдарында жұмыстар жүргізілсе, Глуховка ауылында су құбырының құрылысына ЖБТ әзірлеу аяқталды және конкурстық рәсімдерді өткізуге аудандық бюджеттен 500 мың теңге бөлінді. Сондай-ақ Мостик, Жетіжар, Ерназар және Бөдене ауылдарында су құбыры желілерін салу үшін 37,8 млн теңгеге 4 жобаға жобалық-сметалық құжат әзірлеу жұмысы басталды,- дейді аудан әкімі Шалқар Байбеков.
Аудан басшысы сол сияқты ауылдық елді мекендерді таза ауыз сумен қамту мақсатында Лесной, Старая Крепость, Стеклянка, Черемушка, Беген сынды 5 ауылда блокты-модульдік тазарту және су тарату станцияларын орнату жұмыстары қазан айында аяқталатынын және оған облыстық бюджеттен 52,5 млн теңге бөлінгенін тілге тиек етті.
Білім саласында жылдар бойы қордаланып қалған мәселелер Шалқар Заманбекұлы қос шылбыр, бір тізгінді қолға алғалы шешім тауып жатқанын айта кеткен ләзім. Білім беру саласы бойынша жалпы сомасы 134,7 млн теңге қаржыға 14 жоба жүзеге асырылды. Қ.Рысқұлбеков орта мектебінің ішін, едендерін ағымдағы жөндеу, жасанды жабыны бар футбол алаңын орнату, Глуховка және Березовка орта мектептерінің терезелері мен есіктерін ауыстыру, Қара-Мырза негізгі мектебінің шағын орталығын ағымдағы жөндеу, Борас орта мектеп-бақшасының жылу трассасы мен едендерін ағымдағы жөндеу және қазандығын жөндеу, Мостик орта мектебінің шағын орталығын ағымдағы жөндеу, Өндіріс орта мектебінің жылу трассасын жөндеу, Бөденелі орта мектебін жылумен, сумен қамтамасыз ету және кәріз жүйесін жөндеу, Сосновка орта мектебінің спорт залының едендерін ауыстыру, Беген және Долон орта мектептерінің қазандығын жөндеу жұмыстары жүргізілді.
Сонымен қоса мәдениет саласын дамытуға да көңіл бөлініп отыр. Бесқарағай ауылының Мәдениет үйі және Канонерка ауылындағы клуб үйі ғимараттары ағымдағы жөндеуден өткізілді, бұл 2 жобаға 41,1 млн теңге қаржы жұмсалды.
Кентішілік көшелер мен кірме жолдарды орташа жөндеуге жалпы сомасы 506,8 млн теңге бөлініп, 15 жоба бойынша жұмыстар жүзеге асырылуда. Аталған жобалар бойынша Глуховка ауылында 3 көшені асфальттау, Бесқарағай ауылында 8 көшені және Сейфуллин көшесінің тротуарын жөндеу, Канонерка ауылының бір көшесіне қиыршық тас төсеу, Қарағайлы, Өндіріс және Беген ауылдарына кіретін жолды жөндеу жұмыстары атқарылады. Сонымен қоса Бесқарағай ауылындағы Абай, Қалтаев көшелерін ағымдағы жөндеуден өткізуге жалпы сомасы 44,6 млн теңгеге қосымша бюджеттік өтінімдер тапсырылды.
Қара — Мырза, Қарағайлы және Глуховка ауылдарында жалпы сомасы 39,1 млн теңгеге жасанды жабыны бар футбол алаңдары орнатылды. Көше жарығын орнату бойынша жалпы сомасы 106,7 млн теңге қаржыға 9 жоба іске асырылды. Жетіжар ауылында 7 көше, Кривинка ауылында 3 көше, Глуховка ауылында 11 көше, Бесқарағай ауылында 6 көше, Беген ауылында 2 көше, Старая Крепость ауылында 1 көше жарықтандырылды.
55 жобаның 31-і жүзеге асырылды, қараша айына дейін 21 жоба бойынша межелі жұмыстар еңсеріліп, сумен жабдықтау бойынша 3 жоба 2021 жылға ауысады деп жоспарлануда.
Әйгерім СӘРСЕНҚАЛИ, «Семей таңы»{jcomments off}
